ငွေစက္ကူ ၂ သောင်းကျပ်တန် နဲ့ ဗဟိုဘဏ်နဲ့ ဖျက်သိမ်းဖို့ ကမ္ဘာဘဏ် အမိန့်ချဆိုတဲ့ သတင်းအတု

အဆိုပါ သတင်းအတုကို YouTube ချန်နယ်တစ်ခုက ဖြန့်ဝေထားတာဖြစ်ပြီး အဆို Link ကို ဖေ့စ်ဘွတ်စာမျက်နှာပေါ်လည်း ဖြန့်ဝေထားကြပါတယ်။ ဒီသတင်းအမှားကို ဖြန့်ဝေရာမှာ ၅ မိနစ်ခွဲ ခန့်ကြာမြင့်တဲ့ Video တစ်ပုဒ်နဲ့ ဖြန့်ဝေထားတာဖြစ်ပြီး Video ရဲ့ နောက်ခံမှာ စစ်ကောင်စီခေါင်းဆောင်ရဲ့ ပုံရယ် ဗဟိုဘဏ်ပုံရယ် အသစ်ထွက်မယ်လို့ ကြေညာထားတဲ့ ငွေစက္ကူ ၂ သောင်းကျပ်တန်နဲ့ နိုင်ငံတကာက သူတွေ ပါဝင်တဲ့ ဓါတ်ပုံတွေကို စုစည်းကာ တစ်ပုံတည်း ဖော်ပြထားပြီး ဓါတ်ပုံပေါ်မှာ “ကမ္ဘာ့ဘဏ် အမိန့်ထွက်လာ၊ ဗဟိုဘဏ်နဲ့ ၂ သောင်းတန်ကို ဖျက်သိမ်းခံရ။ အရေးကြီးလို့ မဖြစ်မနေ ကြည့်ပေးကြပါ” (မူရင်း ဖော်ပြထားသည့်အတိုင်း) လို့ ရေးသားထားပါတယ်။

မူရင်း ရေးသားဖြန့်ဝေမှုကို ဒီနေရာ နဲ့ ဒီနေရာမှာ ကြည့်ပါ။

အဆိုပါ Video ကို ဖေ့စ်ဘွတ်ပေါ်မှာနဲ့ YouTube ပေါ်မှာ ဖြန့်ဝေထားကြပြီး ဝင်ရောက်ကြည့်ရှုထားသူ များစွာ ရှိနေပါတယ်။

သတင်းဆန်းစစ်ချက်

အသစ်ထပ်မံရိုက်နှိပ်မယ်လို့ ကြေညာထားတဲ့ ငွေစက္ကူ ၂ သောင်းကျပ်တန် နဲ့ ဗဟိုဘဏ်ကို ဖျက်သိမ်းဖို့ ကမ္ဘာဘဏ်က အမိန့်ထွက်ပေါ်လာတယ်ဆိုတဲ့အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှုသူများအောင် လုပ်ကြံရေးသားထားတဲ့ သတင်းအတုဖြစ်တာကို တွေ့ရပါတယ်။

စစ်ကောင်စီရဲ့ ငွေစက္ကူ ၂ သောင်းတန် အသစ် ရိုက်နှိပ်မှုအပေါ် ကမ္ဘာဘဏ်က မည်သည့်အမိန့်မှ ထုတ်ထားခြင်းမရှိသလို အသစ်ထုတ်မယ့် ငွေစက္ကူရော ဗဟိုဘဏ်ရော ဖျက်သိမ်းခံရခြင်း မရှိပါ။ ဒီငွေစက္ကူ ထုတ်ရမှုအပေါ် စစ်ကောင်စီခေါင်းဆောင် တည်ထားတဲ့ ဘုရား ၁ နှစ်ပြည့်အထိမ်းအမှတ်နဲ့ ၎င်းတို့ရဲ့ ဆင်ဖြူတော် ၁ နှစ်မြောက် မွေးနေ့အဖြစ်ရိုက်နှိပ်တာလို့ ထုတ်ပြန်ထားပါတယ်။

သတင်းအမှား Video မှာ ၂ သောင်းတန် ငွေစက္ကူအသစ်နဲ့ ဗဟိုဘဏ် ဖျက်သိမ်းဖို့ အမိန့်ထုတ်ခံရတယ်လို့ ဖော်ပြထားပေမယ့် Video အတွင်းမှာတော့ “မဝေးတော့သော ကာလကို လက်ချင်းမြဲမြဲချိတ်ကာ စောင့်ကြည့်ကြစို့” ဆိုတဲ့ ဆောင်းပါးတစ်ပုဒ် ကိုသာ ဖော်ပြထားပါတယ်။

သတင်းအမှားဖြန့်ထားတဲ့ အဖွဲ့ကို ဝင်ရောက်စစ်ဆေးကြည့်တဲ့အခါ ဝင်ရောက်ကြည့်ရှု သူများအောင် သတင်းခေါင်းစဉ် ဓါတ်ပုံတွေမှာ လိမ်ညာရေးသားပြီး ကြည့်ရှုများအောင်ပြုလုပ်ထားတဲ့ Click baits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။