အဆိုပါ သတင်းအတုကို လူမှုကွန်ယက် သုံးစွဲသူ အချို့က ဧပြီလ ၂ ရက်နေ့ မနက်အစောပိုင်းမှာ ဖြန့်ထားကြတာ ဖြစ်ပြီး ခွေးလေးတစ်ကောင်ရဲ့ ဓါတ်ပုံရယ်၊ ခွေးတစ်ကောင်အပေါ် အမေရိကန် အလံအုပ်ထားပြီး ဘေးမှာ စစ်သားတွေ ဝမ်းနည်းစွာ ရှိနေကြတဲ့ ပုံ နှစ်ပုံကို သုံးထားပြီး “Ripခလေလေးရယ်တာဝန်းကျေးပါတယ်အေးချမ်းစွားနာယူလိုက်ပါနော်” လို့ ရေးသားထားပါတယ်။
မူရင်းရေးသားဖြန့်ဝေမှုကို ဒီနေရာ ၊ ဒီနေရာ နဲ့ ဒီနေရာမှာ ကြည့်ပါ။
အဆိုပါ သတင်းအတုကို ဖေ့စ်ဘွတ်အကောင့်ပေါင်းများစွာက ဖြန့်ဝေထားပါတယ်။
သတင်းဆန်းစစ်ချက်
K-9 ကယ်ဆယ်ရေး ခွေးလေးတစ်ကောင် မြန်မာပြည်မှာ သေဆုံးသွားတယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ မှားယွင်းဖြန့်ဝေနေတဲ့ သတင်းအတု ဖြစ်တာကို တွေ့ရပါတယ်။
သတင်းအမှားထဲမှာ ပါတဲ့ ဓါတ်ပုံထဲက ခွေးလေးဟာ K-9 (Canine) လို့ခေါ်တဲ့ အထူးလေ့ကျင့်ထားတဲ့ ရှာဖွေရေးနဲ့ ကယ်ဆယ်ရေးလုပ်ငန်းသုံး ခွေးလေးတွေပါတယ်။ ဒီခွေးလေးတွေဟာ နိုင်ငံတကာမှာ ငလျှင်ဒဏ်နဲ့ တစ်ခြား ဘေးအန္တရာယ်ကြောင့် ပြိုကျပျက်ဆီးတဲ့ အဆောက်အဦးတွေကြားမှာ ပိတ်မိနေသူတွေကို ရှာဖွေကယ်ဆယ်ပေးနိုင်တဲ့ အနံ့ခံ အာရုံအထူးလေ့ကျင့်ထားတဲ့ ခွေးလေးတွေ ဖြစ်ပါတယ်။
မြန်မာနိုင်မှာ K-9 အမျိုးအစား ခွေးလေးတွေ တစ်ကောင်မှ သေဆုံးခြင်း မရှိသေးပါဘူး။ ထိုင်းနိုင်ငံက အပျက်အဆီးတွေကြားမှာ ရှာဖွေပေးနေတဲ့ ခွေးလေး ၃ ကောင်ကတော့ ထိခိုက်ဒဏ်ရာ ရရှိမှု အနည်းငယ်ရှိခဲ့ပေမယ့် မတ်လ ၂၈ ရက်နေ့ကနေ အခုထိ တစ်ကောင်မှ သေဆုံးသွားခြင်း မရှိပါဘူး။
သတင်းအမှားထဲမှာ ပါဝင်တဲ့ ခွေးလေးဟာ K-9 Rizo အမည်ရတဲ့ ခွေးလေးဖြစ်ပြီး Charleston County Sheriff’s ရုံးမှာ တာဝန်ထမ်းဆောင်နေရင်း မတ်လ ၁၃ ရက်နေ့ ကွယ်လွန်သွားခဲ့တာ ဖြစ်ပါတယ်။
အဆိုပါ ကယ်ဆယ်ရေးခွေးလေး သေဆုံးမှုနဲ့ ပတ်သက်ပြီး Charleston County Sheriff ရုံးရဲ့ တရားဝင် facebook စာမျက်နှာက မတ်လ ၁၄ ရက်နေ့မှာ ဓါတ်ပုံတွေနဲ့ ထုတ်ပြန်ထားပါတယ်။
K-9 ကယ်ဆယ်ရေးခွေးလေး Rizo သေဆုံးမှုနဲ့ ပတ်သက်တဲ့ ထုတ်ပြန်ချက်ကို ဒီနေရာမှာ ကြည့်ပါ။
မြန်မာပြည်က လူမှုကွန်ယက်သုံးစွဲသူတွေကြားမှာ ဒီထုတ်ပြန်ချက် ပုံတွေကို အသုံးပြုပြီး နားလည်မှု မှားယွင်းစွာ သတင်းအမှားတွေ ဖြန့်ဝေနေကြတာပဲ ဖြစ်ပါတယ်။