အဆိုပါ သတင်းအမှားကို Sit Min ဆိုတဲ့ ဖေ့စ်ဘွတ်အကောင့်က နိုဝင်ဘာလ ၁၇ ရက်နေ့ မှာဖြန့်ဝေထားတာဖြစ်ပြီး သတင်းအမှားထဲမှာ "ကလေးများကျောင်းတက်သည့်အတွက်ဟုဆို ဒီးမော့ဆို မြို့ရှိ စာသင်ကျောင်းအား PDF အကြမ်းဖက်သမားများ မှလက်နက်ကြီးဖြင့်ပစ်ခတ်သဖြင့် ၅နှစ်အရွယ် ကလေးငယ်တစ်ဦးသေဆုံး ယုတ်မာတဲ့နေရာမှာ ပြိုင်စံရှားပဲ" (အသုံးအနှုန်း မူရင်းအတိုင်း) လို့ ရေးသားထားပါတယ်။
မူရင်း ရေးသားဖြန့်ဝေမှုကို ဒီနေရာ ၊ ဒီနေရာ ၊ ဒီနေရာ နဲ့ ဒီနေရာမှာ ကြည့်ပါ။
အဆိုပါ သတင်းအမှားကို ဖေ့စ်ဘွတ်အကောင့်ပေါင်း များစွာနဲ့ ကူးယူဖော်ပြခြင်း ထပ်ဆင့်ဝေမျှခြင်းတွေ ပြုလုပ်ထားကြပါတယ်။
သတင်းဆန်းစစ်ချက်
ကျောင်းတက်ရောက်နေတဲအတွက် PDF တွေက ဒီမော့ဆိုမြို့နယ်က စာသင်ကျောင်းကို လက်နက်ကြီးနဲ့ ပစ်ခတ်လို့ ၅ နှစ်အရွယ် ခလေးငယ်တစ်ဦး သေဆုံးခဲ့တယ် ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ လုပ်ကြံရေးသားထားတဲ့ သတင်းအတုဖြစ်တာကို တွေ့ရပါတယ်။
လက်နက်ကြီးနဲ့ ပစ်ခတ်ခံခဲ့ရတဲ့ စာသင်ကျောင်းဟာ ကျောင်းတက်ရောက်နေသူတွေ မရှိသလို ဖွင့်လှစ်ထားခြင်းလည်း မရှိပါဘူး။ အဆိုပါ ကျောင်းဟာ ဒီးမော့ဆိုမြို့နယ် ကုန်းသာကျေးရွာက ဖြစ်ပြီး မူကြိုကျောင်း တစ်ကျောင်းသာဖြစ်ကာ ဒီနေရာမှာ ဒေသခံတွေ လာရောက် စစ်ရှောင်နေတာ ၅ လခန့် ရှိပြီ ဖြစ်ပါတယ်။ ဒီးမော့ဆိုမြို့ ငွေတောင်ကျေးရွာအခြေစိုက် ခလရ ၁၀၂ တပ်ရင်းက စစ်ရှောင်တွေ ခိုလှုံရာ မြို့အနောက်ခြမ်းကို ၁၂၀ မမ လက်နက်ကြီး ၁၀ လုံးထက်မနည်း ပစ်ခတ်ခဲ့ပြီး မူကြိုကျောင်းပေါ် လက်နက်ကြီး ကျရောက်ပေါက်ကွဲကာ ၅ နှစ်အရွယ် ကလေးငယ် တစ်ဦး သေဆုံးပြီး ၈ ဦး ဒဏ်ရာရရှိခဲ့တာပဲ ဖြစ်ပါတယ်။
စစ်ကောင်စီတပ်တွေက လက်နက်ကြီးနဲ့ ပစ်ခတ်လို့ မူကြိုကျောင်းမှာ စစ်ရှောင်နေတဲ့ ၅ နှစ်အရွယ် ကလေးငယ် တစ်ဦးသေဆုံးခဲ့ရတဲ့ အကြောင်းကို Myanmar Now သတင်းဌာနက ရေးသားထားတဲ့ ပိုစ့် နဲ့ Karenni's Voice က ရေးသားထားတဲ့ သတင်းကို အောက်ပါ Link တွေမှာ ဖတ်ပါ။
ဒီးမော့ဆို မူကြိုကျောင်း လက်နက်ကြီးထိ၊ ၅ နှစ်သမီး သေဆုံးပြီး ၈ ဦး ဒဏ်ရာရ
သတင်းအမှားဖြန့်ထားတဲ့ ဖေ့စ်ဘွတ်အကောင့်တွေကို ဝင်ရောက်စစ်ဆေးကြည့်တဲ့အခါမှာ မည်သူမည်ဝါမှန်း ဖော်ပြထားခြင်း မရှိတဲ့ အကောင့်တုတွေ ဖြစ်တာကို တွေ့ရပြီး စစ်ကောင်စီကို ထောက်ခံ အားပေးတဲ့ ဝါဒဖြန့် သတင်းတွေ သတင်းအမှားတွေ ဆက်တိုက်ဖြန့်ဝေနေတာကို တွေ့ရပါတယ်။