အဆိုပါ သတင်းအတုကို စစ်ကောင်စီရဲ့ ဝါဒဖြန့်တယ်လီဂရမ်ချန်နယ်တွေကတဆင့် လူမှုကွန်ယက်ပေါ်ဖြန့်ထားကြတာဖြစ်ပြီး သတင်းအမှားကို ဖြန့်ဝေရာမှာ ခရီးသည်တင်ကားတွေအနား လက်နက်ကိုင်ပြီးရပ်နေတဲ့၊ စကားပြောနေတဲ့ PDF တွေ ပါဝင်တဲ့ဓါတ်ပုံတွေကို ဖော်ပြထားပြီး ၎င်းဓါတ်ပုံတွေနဲ့အတူ “အကြမ်းဖက် PDF များမှ ခရီးသည်ကားများအား သေနတ်ပြခြိမ်းခြောက်ကာ ဓားပြတိုက်နေ။ ပြည်သူတွေက ရွံရှာတဲ့အကြည့်ဖြင့်ကြည့်နေကြတယ်။ နောင်တရနေကြပုံပဲ။” (အသုံးအနှုန်း မူရင်းဖော်ပြထားသည့်အတိုင်း) လို့ရေးသားထားပါတယ်။
မူရင်းရေးသားဖြန့်ဝေမှုကို ဒီနေရာ ၊ ဒီနေရာ ၊ ဒီနေရာ နဲ့ ဒီနေရာမှာ ကြည့်ပါ။
အဆိုပါ သတင်းအတုကို တယ်လီဂရမ်ချန်နယ်တွေအပြင် ဖေ့စ်ဘွတ်အကောင့်တုတွေနဲ့ ဖြန့်ထားကြပါတယ်။
သတင်းဆန်းစစ်ချက်
ပြည်သူ့ကာကွယ်ရေးတပ်တွေက ခရီးသည်တင်ကားတွေကို လက်နက်ပြပြီး ဓါးပြတိုက်နေတယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ လုပ်ကြံရေးသားထားတဲ့ ဝါဒဖြန့် သတင်းအတုဖြစ်တာကို တွေ့ရပါတယ်။
သတင်းအမှားဖြန့်သူတွေ အသုံးပြုထားတဲ့ ဓါတ်ပုံတွေဟာ မန္တလေးတိုင်း၊ နွားထိုးကြီးမြို့နယ်နဲ့ ဆက်စပ်နေတဲ့ လမ်းပိုင်းတွေမှာ ဖြတ်သန်းသွားလာနေတဲ့ ခရီးသွားယာဉ်တွေကို ဇူလိုင်လ ၃၀ ရက် က စပြီး Natogyi People Defence Force ( NPDF) မြင်းခြံခရိုင် အမှတ် -၄ တပ်ရင်း က ခရီးသွားယာဉ်တွေကို စစ်ဆေးနေကာ ၎င်းတို့ စစ်ဆေးစဉ် မောင်းပြေးတာတွေမလုပ်ကြဘဲ ကြည်ဖြူစွာလက်ခံပေးပြီး ချမှတ်ထားတဲ့ စည်းကမ်းတွေကို ပူးပေါင်းလိုက်နာပေးတောင်းဆိုထားတဲ့ ထုတ်ပြန်ချက်က ဓါတ်ပုံတွေသာ ဖြစ်ပါတယ်။
ဒီဓါတ်ပုံတွေကို အသုံးပြုပြီး PDF တွေက ခရီးသည်တင်ယာဉ်တွေကို ဓါးပြတိုက်နေတယ်လို့ ရေးသားဖြန့်ဝေထားတာ ဖြစ်ပါတယ်။ Natogyi People Defence Force က ထုတ်ပြန်ထားတဲ့ အဆိုပါ သတင်းကို ဒီနေရာမှာ ကြည့်ပါ။
သတင်းအမှားဖြန့်ထားတဲ့ ဖေ့စ်ဘွတ်အကောင့်တွေကို ဝင်ရောက်စစ်ဆေးကြည့်တဲ့အခါ မည်သူမည်ဝါမှန်း ဖော်ပြထားခြင်း မရှိဘဲ စစ်ကောင်စီအတွက် ဝါဒဖြန့်ချီရေးသတင်းတွေ နိုင်ငံရေးအမြတ်ထုတ်ဖို့ လုပ်ကြံရေးသားထားတဲ့ သတင်းအမှားတွေ ၊ တော်လှန်ရေးအင်အားစုတွေကို တိုက်ခိုက်တဲ့ သတင်းအမှားတွေ မကြာခဏ ဖြန့်ဝေနေတာကို တွေ့ရပါတယ်။