အဆိုပါ သတင်းအမှားကို လူမှုကွန်ယက်ပေါ်မှာ စက်တင်ဘာလ ၁၉ ရက်နေ့ မနက်ပိုင်းက စတင်ပျံနှံ့ခဲ့တာကို တွေ့ရပြီး သတင်းအမှားရဲ့ ခေါင်းစဉ်မှာ
ဒေါ်အောင်ဆန်းစုကြည်နာမည်နဲ့ တရားခွင်ဓါတ်ပုံတွေကိုသုံးပြီး "NUG ၏ အကြမ်းဖက်လုပ်ရပ်များကို ဒေါ်အောင်ဆန်းစုကြည် မနှစ်သက်၊ လက်နက်မကိုင်ပဲ ငြိမ်းချမ်းစွာ ဖြေရှင်းရန် တိုက်တွန်း" လို့ ရေးသားထားတဲ့ဒီအကြောင်းအရာကို လူမှုကွန်ရက်မှာဖြန့်ဝေနေကြတာဖြစ်ပါတယ်။
ဒီခေါင်းစဉ်နဲ့အတူ ဖြန့်ဝေထားတဲ့ သတင်းရဲ့ အတွင်းမှာတော့ "NUG CRPH နှင့် PDF တို့၏ လက်နက်ကိုင် လမ်းစဉ်အား သူမ မသိရှိခဲ့ကြောင်း၊ အပစ်မဲ့ပြည်သူများကို သတ်ဖြတ်ခြင်းနှင့် နိုင်ငံပိုင် အဆောက်အဦးများ၊ လမ်းတံတားများကို မိုင်းထောင်ဖျက်ဆီးခြင်းများဟာလည်း ဖြေရှင်းပုံနည်းလမ်း မမှန်ကန်ကြောင်း၊ သူမ မသိပဲ အခုလို လက်နက်ကိုင်လမ်းစဉ်ကို လုပ်ဆောင်ခြင်းအပေါ် များစွာ အံ့ဩဝမ်းနည်းရပြီး ငြိမ်းချမ်းစွာ ဖြေရှင်းလိုတဲ့ သူမကို စော်ကားတာပဲ ဖြစ်ကြောင်း ပြည်သူလူထုအနေဖြင့် အကြမ်းဖက်မှုများကို အားမပေးရန် ပြောလိုကြောင်း ဒေါ်အောင်ဆန်းစုကြည်က သူမ၏ ရှေ့နေမှတဆင့် ပြည်သူလူထုထံ အမှာစကားပါ" လို့ရေးသားထားတာဖြစ်ပါတယ်။
မူရင်းရေးသား ဖြန့်ဝေမှုကို ဒီနေရာ၊ ဒီနေရာ နဲ့ ဒီနေရာ မှာကြည့်ပါ။
အဆိုပါ သတင်းအမှားကို သတင်းလောက ထဲက အယ်ဒီတာတချို့ပါ သတင်းအစစ်ထင်ပြီး ဖြန့်ဝေနေကြသိလို နိုင်ငံရေးတက်ကြွလှုပ်ရှားသူ တချို့ကလည်း သတင်းအမှန်ထင်ပြီး သုံးသပ်ချက်တွေ ရေးသားနေတာကို တွေ့ရပါတယ်။
သတင်းဆန်းစစ်ချက်
ဒေါ်အောင်ဆန်းစုကြည်ပြောကြားထားတယ်ဆိုတဲ့ ဒီအကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ Photoshop နဲ့ သတင်းစာပုံစံ ဖန်တီးထားတဲ့ သတင်းအတုဖြစ်တာကို တွေ့ရပါတယ်။
ဒီသတင်းအမှားနဲ့ ပတ်သက်ပြီး ဒေါ်အောင်ဆန်းစုကြည်ရဲ့ ရှေ့နေဖြစ်သူ ဦးခင်မောင်ဇော်က ""မိုးလုံးပြည့်မုသာဝါဒ"ပါ ကျနော်တို့အမှုသည်က လူအများစိတ်ညှိုးငယ်စေမဲ့ ဘယ်စကားမှ မဖြန့်ခိုင်းပါဘူး" လို့ ၎င်းရဲ့ ဖေ့စ်ဘွတ်စာမျက်နှာမှာ ရေးသားထားပါတယ်။
ဒီလို သတင်းစာပုံစံဖြန့်ဝေထားတဲ့ သတင်းအတုတွေဟာ ရွေးကောက်ပွဲမတိုင်ခင်ထဲက ဖြန့်ဝေလေ့ရှိတဲ့ သတင်းအတုတွေဖြစ်ပြီး မကြာခဏ ၎င်းပုံစံနဲ့ ပြန်လည်ဖြန့်ဝေနေတာကို တွေရပါတယ်။ ယခင် သတင်းစာပုံစံနဲ့ ထွက်ပေါ်ဖူးတဲ့ သတင်းအမှားတွေကို အောက်ပါ Link မှာ ဖတ်ပါ။
ပြည်ခိုင်ဖြိုးကို တိုက်ခိုက်ကြောင်း သတင်းစာပုံစံ ဖန်တီးထားတဲ့ သတင်းအတု
ဆန္ဒပြသူတွေကို နှိမ်နှင်းဖို့ သမ္မတက အမိန့်ပေးခဲ့တယ်ဆိုတဲ့ သတင်းအမှား
မဲမသမာမှုတွေကြောင့် ဦးဝင်းထိန် နုတ်ထွက်တယ်ဆိုတဲ့ သတင်းအမှား
မဲစာရင်းနှင့်ကော်မရှင်ကိစ္စ ဒေါက်တာမျိုးညွန့်ပြောဆိုထားခြင်းမရှိ