ဒီအကြောင်းအရာကို Soe Koko ဆိုတဲ့ ဖေစ့်ဘွတ်အကောင့်မှာ အောက်တိုဘာလ ၁၀ ရက်နေ့မှာ စတင်ဖြန့်ဝေခဲ့တာဖြစ်ပြီး ထပ်ဆင့်ဖြန့်ဝေမှုတွေလည်း ရှိနေပါတယ်။
ဖြန့်ဝေရာမှာ ကြာချိန် ၁ မိနစ်ခန့်သာရှိတဲ့ ဗီဒီယိုကလစ်တစ်ခုနဲ့အတူ 'ကမ္ဘာ့ အင်အားအကြီးဆုံးမုန်တိုင်း US' လို့ ရေးသားဖြန့်ဝေနေတာပါ။
ဖြန့်ဝေမှုကို ဒီနေရာ မှာ ဝင်ရောက်ကြည့်ရှု့နိုင်ပါတယ်။
သတင်းဆန်းစစ်ချက်
ဖြန့်ဝေနေတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက် ကြည့်ရှုသူ များအောင် နဲ့ ဖြန့်ဝေမှုတွေ များအောင် တမင်လိမ်ညာ ဖန်တီးထားတဲ့ ရုပ်သံဖိုင် ဖြစ်ပါတယ်။
ဖြန့်ဝေနေတဲ့ ဗီဒီယိုကလစ်ထဲက ပုံရိပ်တွေဟာ AI နဲ့ ဖန်တီးထားတဲ့ မုန်တိုင်းပုံတွေကို ဖြတ်ညှပ်ဆက်ကာ ဗီဒီယိုဖိုင်အဖြစ် ဖန်တီးထားတာသာ ဖြစ်ပါတယ်။
ဒီလို AI နဲ့ ဖန်တီးထားတဲ့ ဓာတ်ပုံတွေကို Freepik နဲ့ Vecteezy တို့လို ဝက်ဘ်ဆိုက်တွေမှာ ဝင်ရောက် ကြည့်ရှု့နိုင်ပါတယ်။
ဒီနေရာ နဲ့ ဒီနေရာ မှာ ဝင်ရောက်ကြည့်ရှု့ပါ။
National Hurricane Center ရဲ့ အချက်အလက်ကို ကိုးကားပြီး AP သတင်းဌာနမှာ အောက်တိုဘာလ ၁၁ ရက်နေ့က ဖော်ပြထားတဲ့ အချက်အလက်တွေအရ အမေရိကန်နိုင်ငံ ဖလော်ရီဒါပြည်နယ်ကို ဝင်ရောက်တိုက်ခိုက်ခဲ့တဲ့ ဟာရီကိန်း မုန်တိုင်း မီလ်တန်ရဲ့ အမြင့်ဆုံး လေတိုက်နှုန်းဟာ တစ်နာရီကို ၁၈၀ မိုင်အောက်သာ ရှိခဲ့ပါတယ်။ အတိအကျ ဆိုရရင် လေတိုက်နှုန်းဟာ တစ်နာရီကို ၁၇၃ မိုင်အထိသာ တိုက်ခိုက်ခဲ့တာ ဖြစ်ပါတယ်။
ဒါ့ကြောင့် ကမ္ဘာပေါ်မှာ အင်အားအပြင်းဆုံးမုန်တိုင်းဆိုပြီး ဖြန့်ဝေနေတာတွေဟာ သတင်းအမှားတွေပဲ ဖြစ်ပါတယ်။
AP သတင်းဌာနမှာ ဖော်ပြထားတဲ့ ဟာရီကိန်းမုန်တိုင်း မီလ်တန် ရဲ့ လေတိုက်နှုန်းအကြောင်းကို ဒီနေရာ မှာ ဝင်ရောက် ကြည့်ရှု့နိုင်ပါတယ်။
အမေရိကန်နိုင်ငံ ပြည်နယ်အချို့ကို ဝင်ရောက်တိုက်ခတ်ခဲ့တဲ အဆင့် ၄ မုန်တိုင်း ဟာရီကိန်း ဟယ်လင် ဝင်ရောက် တိုက်ခတ်ပြီး သီတင်းနှစ်ပတ်အတွင်း နောက်တစ်ကြိမ် အဆင့် ၅ မုန်တိုင်း မီလ်တန် ဝင်ရောက်တိုက်ခတ်ခဲ့တာ ဖြစ်ပါတယ်။