အဆိုပါ သတင်းအမှားကို Sertyd ဆိုတဲ့ ဖေ့စ်ဘွတ်ပေ့ချ်က ဧပြီလ ၁၅ ရက်နေ့ ၁ နာရီ ၁၅ မိနစ်မှာ ရေးသားဖြန့်ဝေထားတာဖြစ်ပြီး အထက်ပါအကြောင်းအရာနဲ့အတူ သီဟတင်စိုး အင်တာဗျူးဖြေဆိုနေတဲ့ Video တစ်ပုဒ်တင်ထားပါတယ်။ ၎င်း Video ဟာ ၃ မိနစ်နဲ့ ၂၁ စက္ကန့်ကြာမြင့်ပြီး Video ရဲ့ အပေါ်မှာ "သင်္ကြန်မှာ သီချင်းမဆိုရင် ဖမ်းမည်ဟု စကစ က ခြိမ်းခြောက်လို့ ဖျော်ဖြေရတာပါဟု သီဟတင်စိုးပြော" တဲ့ စာကို ရေးသားထားပါတယ်။ အဲ့ဒီ Video ကို ၎င်းရဲ့ ဖေ့စ်ဘွတ်ပေ့ချ်မှာ "စစ်ကောင်စီရဲ့ ခြိမ်းခြောက်မှုကြောင့် သီချင်းဆိုရတာပါဆိုတဲ့ သီဟတင်စိုး" ဆိုတဲ့ ခေါင်းစဉ်ကို ရေးသားပြီး ဖြန့်ဝေထားပါတယ်။
မူရင်း ရေးသားဖြန့်ဝေမှုကို ဒီနေရာ မှာကြည့်ပါ။
အဆိုပါ သတင်းအမှား Video ကို Like လုပ်ထားသူ ၁ သိန်း ၃ သောင်းကျော်နဲ့ ထပ်ဆင့်ဝေမျှထားသူ ၁၁၀၀၀ ခန့်ရှိကာ ဝင်ရောက်ကြည့်ရှု့သူ ၂.၈ သန်းခန့် ရှိနေပါတယ်။
သတင်းဆန်းစစ်ချက်
စစ်ကောင်စီက ခြိမ်းခြောက်လို့ သင်္ကြန်မှာ သီချင်းဆိုရတာ ဖြစ်တယ်လို့ သီဟတင်စိုး ဖြေရှင်းထားတယ်ဆိုတဲ့ Video ကို Boom Myanmar က အချက်အလက် စစ်ဆေးကြည့်တဲ့အခါ လုပ်ကြံရေးသားထားတဲ့ သတင်းအဟောင်းကို အသုံးပြုပြီး ပြန်လည်ဖြန့်ဝေထားတဲ့ သတင်းအမှားဖြစ်တာကို တွေ့ရပါတယ်။
ဒီ Video ဟာ သင်္ကြန် သီချင်းဆိုတဲ့ ကိစ္စနဲ့ရော ၊ စစ်ကောင်စီနဲ့ ပါ မသက်ဆိုင်ပါဘူး။ သီဟတင်စိုးရဲ့ ညီဖြစ်သူရဲ့ စွပ်စွဲချက်တွေကို ပြန်လည်ဖြေရှင်းထားတဲ့ အကြောင်းအရာသာ ဖြစ်ပါတယ်။
ဒီ Video ဟာ ၂၀၂၀ ခုနှစ် ဇွန်လ ၃ ရက်နေ့က Myanmar Celebrity TV ရဲ့ ဖေ့စ်ဘွတ်ပေ့ချ်မှာ တင်ထားတဲ့ သတင်းတစ်ပုဒ် ဖြစ်ပြီး သီဟတင်စိုးရဲ့ ညီအရင်းဖြစ်သူ စည်သူတင်စိုးက ၎င်းအကိုဖြစ်သူရဲ့ ငွေကြေး လိမ်လည်မှု ပြဿနာတွေနဲ့ မိသားစုအတွင်းရေးကိစ္စတွေကို ဖွင့်ချခဲ့ပြီးနောက် ပရိတ်သတ်တွေကြား ဝေဖန်ပြောဆိုခံရမှုတွေ ရှိလာတဲ့အတွက် သီဟတင်စိုးက ပြန်လည်ဖြေရှင်းထားတဲ့ Video သာဖြစ်ပါတယ်။
၂၀၂၀ ခုနှစ် ဇွန်လ ၃ ရက်နေ့က MC TV သတင်းဌာနက တင်ထားတဲ့ မူရင်း Video ကို ဒီမှာ ကြည့်ပါ။
သတင်းအမှားဖြန့်ထားတဲ့ Sertyd ဆိုတဲ့ ဖေ့စ်ဘွတ်ပေ့ချ်ကို ဝင်ရောက် စစ်ဆေးကြည့်တဲ့အခါ ဝင်ရောက်ကြည့်ရှု့သူများအောင် ပြုလုပ်ထားတဲ့ သတင်းအတု video တွေနဲ့ ဝင်ငွေရှာနေတဲ့ Page ဖြစ်တာကို တွေ့ရပါတယ်။