ဒီသတင်းကို Oneday.press ဆိုတဲ့ ဝက်ဘ်ဆိုက်မှာ သြဂုတ်လ ၂၇ ရက်က ၈ မိနစ်ကျော်ကြာ ဗွီဒီယိုဖိုင်တစ်ခုနဲ့ တွဲလျက် ရေးသားဖော်ပြခဲ့တာဖြစ်ပြီး သတင်းထူးဂျာနယ် ဆိုတဲ့ ဖေစ့်ဘွတ်ပေချ့်က ယင်းနေ့မှာပဲ ပြန်လည်ဖြန့်ဝေခဲ့တာပါ။
ဖြန့်ဝေရာမှာ ၈ မိနစ်ကျော်ကြာ ဗွီဒီယိုဖိုင်တစ်ခုနဲ့ အတူ "အားလုံးမထင်မှတ်ထားတဲ့သတင်း ဗဟိုဘဏ်လစ်သွားပြီ" ဆိုတဲ့ အများပြည်သူ အထိတ်တလန့် ဖြစ်စေမယ့် ခေါင်းစဉ်တပ်ကာ ပြန်လည်ဖြန့်ဝေခဲ့တာ ဖြစ်ပါတယ်။ ဒီအကြောင်းအရာကို ပြန်လည်ဖြန့်ဝေသူ အများအပြားရှိနေပြီး ဆက်လက်ဖြန့်ဝေနေတာလည်း ရှိပါတယ်။ ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ကြည့်ရှု့နိုင်ပါတယ်။
သတင်းဆန်းစစ်ချက်
ဖြန့်ဝေထားတဲ့ ၈မိနစ်ကျော်ကြာ ဗွီဒီယိုဖိုင်ထဲက အကြောင်းအရာရဲ့ ပထမ သုံးမိနစ်ခွဲအထိမှာ စစ်တပ် အာဏာသိမ်းပြီးနောက်ပိုင်း မြန်မာနိုင်ငံတော် ဗဟိုဘဏ်က အမေရိကန်ဒေါ်လာတွေ ဈေးပြိုင်လေလံနဲ့ ထုတ်ရောင်းချနေတဲ့ အခြားမီဒီယာတွေမှာ ဖော်ပြထားတဲ့ သတင်းတွေကို ပြန်လည်ကြေငြာနေတဲ့ အသံဖိုင်ဖြစ်ပါတယ်။
ခေါင်းစဉ်မှာရေးသားထားသလို့ "အားလုံးမထင်မှတ်ထားတဲ့သတင်း ဗဟိုဘဏ်လစ်သွားပြီ" ဆိုတဲ့ အဓိပ္ပါယ်ကောက်ယူလို့ ရတဲ့ သို့မဟုတ် အဓိပ္ပါယ်ဆင်တူတဲ့ အချက်အလက် တစ်စုံတရာ မပါတာကို တွေ့ရပါတယ်။
ပထမ သုံးမိနစ်ခွဲနောက်ပိုင်း သတင်းမှာ အပြည်ပြည်ဆိုင်ရာတရားရုံး ICJ မှာ စစ်ကောင်စီအကြီးအကဲ တရားစွဲခံရတယ်ဆိုတဲ့ သတင်းအကြောင်း ပြောထားတာပါ။ ဒါကြောင့် ဒီသတင်းဟာ ခေါင်းစဉ်တလွဲတပ်ကာ လူအများအထင်အမြင်လွဲစေရန် တမင်လုပ်ကြံရေးသားထားတဲ့ သတင်းအမှားပဲ ဖြစ်ပါတယ်။
ဘဏ်တွေနဲ့ ပါတ်သတ်တဲ့ သတင်းအမှားတွေ မကြာခဏ ထွက်ပေါ်နေပြီး ပြီးခဲ့တဲ့ သြဂုတ်လ ၁၃ ရက်နေ့ကလည်း ငွေစက္ကူနဲ့ ဘဏ်တွေ ဖျက်သိမ်းမယ်ဆိုတဲ့ ကောလဟလအတွက် ဗဟိုဘဏ်က ထုတ်ပြန်ချက်ထုတ်ပြီး ဖြေရှင်းခဲ့ရပါသေးတယ်။