အဆိုပါ သတင်းအမှားကို မေလ ၂၉ ရက်နေ ည ၉ နာရီ ၅၇ မိနစ်မှာ ရေးသားဖြန့်ဝေထားတာဖြစ်ပြီး သတင်းအမှားကို ဖြန့်ဝေရာမှာ ကြမ်းပြင်ပေါ်အိပ်နေတဲ့ ဆေးသုတ်တဲ့အလုပ်လုပ်နေသူ တစ်ဦးနဲ့ စစ်ကောင်စီတပ်သား ၂ ဦးကို လက်အုပ်ချီကာ စကားပြောနေတဲ့ အင်္ကျီအဖြူဝတ်ထားသူ တစ်ဦးတို့ရဲ့ ဓါတ်ပုံကို တင်ထားပါတယ်။ ၎င်း အင်္ကျီအဖြူဝတ်ထားသူရဲ့နောက်မှာ ကျောင်းစိမ်းယူနီဖောင်း ဝတ်ဆင်ထားတဲ့ ဆရာမတွေပါ ပါဝင်နေပါတယ်။အဆိုပါး ဓါတ်ပုံ ၂ ပုံနဲ့အတူ "ကျောင်းဆရာဘ၀ကနေ CDM လုပ်ပြီးနောက်ပိုင်း NUG ကနေ ဘာအထောက်ပံ့မှ မပေးလို ဆေးသုတ်သမားဘ၀နဲ့ အသက်မွေးနေရာက ၂၀၂၂ မှာ Non CDM အယူခံ၀န်ရင်း မှားမိသမျှ ကြုံကြိုက်တုံး တောင်းပန်နေပုံ" လို့ ရေးသားထားပါတယ်။
မူရင်းရေးသားဖြန့်ဝေမှုကို ဒီနေရာ၊ ဒီနေရာ ၊ ဒီနေရာ နဲ့ ဒီနေရာ မှာ ကြည့်ပါ။
အဆိုပါ သတင်းအမှားကို Like လုပ်ထားသူ ၁၀၀ ကျော်နဲ့ ထပ်ဆင့်ဝေမျှထားသူတွေရှိကာ တစ်ခြားဖေ့စ်ဘွတ်အကောင့်တွေကလည်း ကူးယူဖော်ပြနေကြပါတယ်။
သတင်းဆန်းစစ်ချက်
CDM ကျောင်းဆရာတစ်ဦးက Non CDM ပြုလုပ်ပြီး ၎င်းရဲ့အမှားအတွက် စစ်ကောင်စီတပ်သားတွေကို တောင်းပန်နေတယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ လုပ်ကြံရေးသားထားတဲ့ ဝါဒဖြန့် သတင်းအမှားဖြစ်ကြောင်း တွေ့ရပါတယ်။
အဆိုပါ သတင်း ဓါတ်ပုံ ၂ ပုံထဲပါဝင်သူဟာ တစ်ယောက်စီသာဖြစ်ပါတယ်။ ဆေးသုတ်သမားအဖြစ်အသက်မွေးနေတဲ့ CDM ကျောင်းဆရာရဲ့ ဓါတ်ပုံဟာ လူမှုကွန်ယက်ပေါ် ဒီရက်ပိုင်းအတွင်း ပျံ့နှံ့ခဲ့တာဖြစ်ပြီး ဒီဓါတ်ပုံနဲ့ စစ်တပ်ကို လက်အုပ်ချီစကားပြောနေတဲ့ Non CDM ကျောင်းဆရာရဲ့ ဓါတ်ပုံကို ယှဉ်တွဲကာ စစ်အာဏာရှင်ဆန့်ကျင်ရေးလှုပ်ရှားသူတွေက Non CDM ကျောင်းဆရာကို လူမှုရေးပြစ်ဒဏ်ခတ်ဖို့ ရေးသားနေကြတဲ့ ဓါတ်ပုံတွေ ဖြစ်ပါတယ်။
အဆိုပါ ဓါတ်ပုံ ၂ ပုံကို အသုံးပြုပြီး စစ်ကောင်စီ ထောက်ခံသူတွေက အခုလို သတင်းအမှားဖြန့်ပြီး ထင်ယောင်ထင်မှားဖြစ်အောင် တန်ပြန်သတင်းအမှား ဖြန့်လာခြင်းသာ ဖြစ်ပါတယ်။
၎င်း ဓါတ်ပုံ ၂ ပုံတွဲ ယှဉ်တွဲပြပြီး Non CDM ကျောင်းဆရာကို လူမှုရေး ပြစ်ဒဏ်ခတ်ဖို့ ရေးသားကြတဲ့ အကြောင်းအရာကို ဒီနေရာ နဲ့ ဒီနေရာ မှာ ကြည့်ပါ။