စစ်တပ်က အာဏသိမ်းပြီးနောက်ပိုင်း ယမန်နှစ် မတ်လကတည်းက ရေးသားထုတ်လွှင့်ခွင့် ပိတ်သိမ်းခံထားရတဲ့ သတင်းဌာနတွေထဲက တစ်ခုဖြစ်တဲ့ 7 Day News သတင်းဌာနရဲ့ နာမည်ကို တုပယူထားတဲ့ 7Day news ဆိုတဲ့ ဖေစ့်ဘွတ်ပေချ့်အတုက သတင်းအတုတွေ ဆက်တိုက် ဖြန့်ဝေနေတာပါ။
သတင်းတုတွေဖန်တီးရာမှာ ပရိတ်သတ်စိတ်ဝင်စားမယ့် ခေါင်းစဉ်တွေရေးသားကာ ဗွီဒီယိုဖိုင်တွေ ပြုလုပ်ပြီး အများဆုံးဖြန့်ဝေနေတာ တွေ့ရပါတယ်။
"အခုပဲ မြဝတီမှာလွှင့်နေပြီ အာဏာပြန်အပ်တော့မယ်နဲ့ တူတယ်၊ သမ္မတ ၂ ဦးထပ်ဖမ်း" စတဲ့ ခေါင်းစဉ်တွေ လုပ်ကြံရေးသားကာ သတင်းတုတွေ ဖြန့်ဝေနေတဲ့ ပေချ့်ဖြစ်ပါတယ်။
ပေချ့်မှာ ဖြန့်ဝေထားတဲ့ သတင်းတွေကို ဒီနေရာ၊ ဒီနေရာ နဲ့ ဒီနေရာ တွေမှာ ကြည့်ရှု့နိုင်ပါတယ်။
သတင်းဆန်းစစ်ချက်
ဒီဖေစ့်ဘွတ်ပေချ့်မှာ ဖြန့်ဝေထားတဲ့ သတင်းတွေကို ဝင်ရောက်ကြည့်ရှု့ရင် ခေါင်းစဉ်နဲ့ ရုပ်သံဖိုင်ထဲပါဝင်တဲ့ အကြောင်းအရာတွေဟာ ဆက်စပ်မှုမရှိတာကို တွေ့ရမှာပါ။ နေ့စဉ် သတင်းအတု အနည်းဆုံး ၂ ပုဒ်ခန့် ဖြန့်ဝေနေတဲ့ ဒီဖေစ့်ဘွတ်ပေချ့်ကို Like လုပ်ထားသူ လေးထောင်ကျော်ရှိနေပြီး Follower နှစ်သောင်းလေးထောင်ခန့် ရှိနေပါတယ်။
ဖြန့်ဝေထားတဲ့ သတင်းတွေဟာ ရေးသားထားတဲ့ ခေါင်းစဉ်နဲ့ ဆက်စပ်မှုမရှိတဲ့ သတင်းတု သတင်းအမှားတွေ ဖြစ်နေပေမယ့် အချို့ပိုစ့်တွေမှာ react ပေးသူနဲ့ ထပ်ဆင့်ဖြန့်ဝေသူ ထောင်ကျော်ထိ ရှိနေတာလည်း တွေ့ရပါတယ်။
စစ်ကောင်စီ အာဏာသိမ်းပြီးနောက်ပိုင်း မဇ္စျိမ၊ DVB၊ Myanmar Now၊ 7 Day News နဲ့ ရန်ကုန်ခေတ်သစ် သတင်းဌာနတွေအပြင် ဒေသတွင်းနဲ့ တိုင်းရင်းသားမီဒီယာတွေဖြစ်ကြတဲ့ တာချီလိတ်သတင်း အေဂျင်စီ၊ မြစ်ကြီးနားသတင်းဂျာနယ်၊ The 74 Media ၊ Delta News Agency စတဲ့ သတင်းဌာန ၉ ခု ဟာ ပိတ်သိမ်းခံထားရတာဖြစ်ပေမယ့် 7 Day News သတင်းဌာနကလွဲပြီး ကျန်သတင်းဌာနတွေဟာ ဆက်လက်လုပ်ကိုင်နေကြဆဲ ဖြစ်ပါတယ်။
သတင်းတုတွေ ဆက်တိုက်ဖြန့်ဝေနေတဲ့ 7Day news ဆိုတဲ့ ဖေစ့်ဘွတ်ပေချ့်ကို ဒီနေရာ မှာ ကြည့်ရှု့နိုင်ပါတယ်။