ဒီအကြောင်းအရာကို ဩဂုတ်လ ၃၀ ရက်နေ့ နေ့လည်ပိုင်းကစပြီး စစ်တပ်ထောက်ခံတဲ့ ဖေစ့်ဘွတ်အကောင့်နဲ့ ဆိုရှယ်မီဒီယာ ချန်နယ်တွေမှာ ဖြန့်ဝေနေတာဖြစ်ပါတယ်။
ဖြန့်ဝေရာမှာ ‘MNDAA အပ်ထားသော တရုတ်အမျိုးသားများဘဏ်(CNB)နှင့် ယူနန်အစိုးရဘဏ်(YGB)မှ ယွမ် ၇.၈ ဘီလီယံ၊ TNLA အပ်ထားသော ယူနစ်အစိုးရဘဏ်(YGB)မှ ၅ဘီလီယံ၊ AA အပ်ထားသော တရုတ်အစုစပ်ဘဏ် (CCB) မှ ၅.၈ ဘီလီယံ၊ KIA အပ်ထားသော တရုတ်နိုင်ငံခြားကုန်သွယ်မှုဘဏ်(CTB)မှ ၆.၁ဘီလီယံ၊ NUG အပ်ထားသော ဟောင်ကောင် စီးပွါးရေးဘဏ်(HBB)မှ ၅၂၈.၂သန်း အား တရုတ်အစိုးရမှ ဘဏ်အကောင့်များ အား ယနေ့တွင်ထပ်မံ ပိတ်သိမ်းခဲ့ပါသည်’ လို့ ရေးသားထားပါတယ်။
ဖြန့်ဝေမှုတွေကို ဒီနေရာ၊ ဒီနေရာ နဲ့ ဒီနေရာ တွေမှာ ဝင်ရောက်ကြည့်ရှု့နိုင်ပါတယ်။
သတင်းဆန်းစစ်ချက်
ဒီအကြောင်းအရာကို Boom Myanmar က အချက်အလက် စစ်ဆေး ကြည့်တဲ့အခါ စစ်တပ်ထောက်ခံသူတွေ လုပ်ကြံ ဖန်တီးထားတဲ့ သတင်းအတု ဖြစ်တာကို တွေ့ရပါတယ်။
ဒီဖြန့်ဝေမှုနဲ့ ပတ်သက်ပြီး NUGအစိုးရ၊စီမံကိန်း၊ဘဏ္ဍာရေးနှင့် ရင်းနှီးမြုပ်နှံမှုဝန်ကြီးဌာန ပြည်ထောင်စုဝန်ကြီး ဦးတင်ထွန်းနိုင်က ဖြန့်ဝေနေတဲ့ ဘဏ်မှာ NUG က အပ်ထားတဲ့ငွေ တပြားတချပ်မှ မရှိကြောင်း သူ့ရဲ့ ဖေစ့်ဘွတ် အကောင့်မှာ ပြန်လည်ဖြေရှင်းထားပါတယ်။
ဦးတင်ထွန်းနိုင်ရဲ့ ဖေစ့်ဘွတ်အကောင့်မှာ ပြန်လည်ဖြေရှင်းထားမှုကို ဒီနေရာ မှာ ဝင်ရောက်ကြည့်ရှု့နိုင်ပါတယ်။
ဒီဖြန့်ဝေနေတဲ့ အကြောင်းအရာနဲ့ ပတ်သက်ပြီး ကျန်တဲ့ KIA၊ မြန်မာအမျိုးသားဒီမိုကရက်တစ် မဟာမိတ် တပ်မတော် (MNDAA)၊ အာရက္ခတပ်တော်(AA) နဲ့ တအာင်းအမျိုးသားလွတ်မြောက်ရေးတပ်မတော်(TNLA) တွေဘက်ကတော့ တစ်စုံတစ်ရာ ပြန်လည်ဖြေရှင်းထားတာ မတွေ့ရသေးပါဘူး။