ဒီသတင်းကို ပြည်တွင်းမှာ သတင်းအမှားတွေဖြန့်ဝေနေတဲ့ THINKMYANMAR ဝက်ဆိုဒ်ကလည်းဖေါ်ပြထားပါတယ်။ ဒီလို သတင်းမှားဖြန့်ဝေထားတဲ့သတင်းကို လူပေါင်းများစွာက သတင်းအမှန်အဖြစ်နဲ့ပြန်လည်ဝေမျှခဲ့ကြပါတယ်။
ဒီသတင်းအမှားနဲ့ပတ်သက်ပြီးရေးသားဖြန့်ဝေရာမှာ Avigan ဆေး၊ Nafamostat စတဲ့ ဆေးတွေဟာ ကိုရိုနာရောဂါနဲ့ပတ်သက်လို့သက်သာပျောက်ကင်းနိုင်တယ်ဆိုရုံမက အခြားနာမည်အမျိုးမျိုးအသုံးပြု ဖြန့်ဝေနေတာဖြစ်ပြီး တူညီတာကတော့ ဂျပန်သိပ္ပံပညာရှင်တွေက ကိုရိုနာဗိုင်းရပ်စ်ကာကွယ်ဆေး ရှာဖွေ တွေ့ရှိပြီဆိုတဲ့အချက်အလက်အမှားကို ဖြန့်ဝေခဲ့ကြတာ ဖြစ်ပါတယ်။
အဲ့ဒီလိုရေးသားဖြန့်ဝေမှုတွေဟာ သတင်းမှားသာဖြစ်တဲ့အကြောင်း BOOM ဝက်ဆိုက်က AFP သတင်း ကိုအခြေခံပြီး ဖေါ်ပြထားပြီးဖြစ်ပါတယ်။
တကယ်တော့ ဒီသတင်းအမှားမှာပါဝင်တဲ့ ဂျပန်သိပ္ပံပညာရှင်တွေ စမ်းသပ်ထုတ်လုပ်နေတယ်ဆိုတာက COVID-19 ကို ကုသဘို့အတွက် မဟုတ်ပဲ အခြားဆေးအသစ်တစ်မျိုးအတွက် စမ်းသပ်မှုပြုလုပ်နေခြင်းသာ ဖြစ်ပါတယ်။ ဒီသတင်းအမှားနဲ့ ပတ်သက်လို့ ဖိလစ်ပိုင်အစားအစာနဲ့ ဆေးဝါးကွပ်ကဲရေးဦးစီးဌန ကလည်း အဆိုပါ ဖြန့်ဝေမှုတွေမှာ ထည့်သွင်းဖော်ပြနေတဲ့ ဆေးဆိုတာတွေက မှတ်ပုံတင်ထားခြင်းမရှိတဲ့အတွက် အန္တရယ်ရှိကြောင်း သတိပေးထားပါတယ်။
အထက်ပါပုံမှာ ဖေ့ဘွတ်ပေါ်က သတင်းမှားဖြန့်ဝေမှုကို မှတ်တင်ထားခြင်းဖြစ်ပါတယ်။
နိုင်ငံတကာနည်းတူ ပြည်တွင်းမှာလည်း ဒီသတင်းအမှားကို Maung Shin ဆိုတဲ့ ဖေ့စ်ဘွတ်အကောင့်ကနေ ဧပြီလ ၃ ရက်နေ့မှာ စတင်ရေးသားခဲ့ပြီး အဲ့ဒီသတင်းအမှားကိုပဲ လက်ရှိမှာ ထပ်ဆင့်ဝေမျှသူ လေးထောင်ကျော် ကျော်ရှိနေသလို ထပ်မံပြီးလည်း ဝေမျှနေကြဆဲ ဖြစ်ပါတယ်။
ဒီသတင်းမှား ဖြန့်ဝေမှုမှာ ပို့စ်တင်သူက ဖေ့စ်ဘွတ်ပေါ်မှာ အောက်ပါအတိုင်း ရေးသားဖေါ်ပြခဲ့ပါတယ်။
"ဝမ်းသာစရာ သတင်းကောင်းပါ။ ကိုရိုနာကာကွယ်ဆေးတွေ့ပါပြီ...တဲ့။ အားလုံးမျှော်လင့်နေကြသလို ဂျပန်ကအရင်တွေ့မလား..၊ အမေရိကန်က အရင်တွေ့မလား...ဆိုတဲ့အတိုင်း၊ အခုဂျပန်ကအရင်တွေ့ပါပြီတဲ့.." လို့ရေးသားခဲ့တာဖြစ်ပါတယ်။
အဆိုပါသတင်းမှား ဖြန့်ဝေသူဟာ အောက်ပါအချက်တွေကိုလည်း ထည့်သွင်းရေးသားထားပါတယ်။
- Nafamostat ဆေးဝါးကို Covid-19 ကူးစက်ခံယူထားရှိသောတိရိစ္ဆာန်သို့ စမ်းသပ်ကုသမှု ပြုလုပ်ခဲ့ရာတွင် အောင်မြင်မှုရရှိခဲ့ကြောင်း၊
- 'တိုကျိုတက္ကသိုလ်' က သက်ဆိုင်ရာအစိုးရထံ အကြောင်းကြားတင်ပြခဲ့ပြီးဖြစ်ကြောင်း၊
- Nafamostatဆေးဝါးမှာ ယခင်ကတည်းက ဂျပန် FDA (Food and Drug Association) မှခွင့်ပြုချက်ရထားပြီးသားဆေးဝါးဖြစ်တဲ့အတွက် ဂျပန်ကျန်းမာရေးဝန်ကြီးဌာနမှ ခွင့်ပြုချက် ရရှိထားပြီ ဖြစ်ကြောင်း စတဲ့အချက်အလက်အမှားတွေကို ထည့်သွင်းရေးသားထားပါတယ်။
အလားတူ COVID-19 လူနာတွေကို Avigan ဆေးနဲ့စတင်ကုသ ဆိုတဲ့ ဖြန့်ဝေနေမှုတွေကိုလည်း တွေ့ရပါတယ်။
အောက်ပါပုံမှာ သတင်းမှားဖြန့်ဝေထားမှုတစ်ခုကို မှတ်တမ်းယူထားတဲ့ ပုံဖြစ်ပါတယ်။
ဒီသတင်းအမှားကိုလည်း THINKMYANMAR ဝက်ဆိုက်က စတင်ရေးသားခဲ့တာဖြစ်ပြီး မြန်မာသတင်းဦး သတင်းထူး ဆိုတဲ့ ဖေ့စ်ဘွတ်ဂရုက ဧပြီလ ၄ ရက်နေ့မှာ ဖြန့်ဝေခဲ့တာဖြစ်ပါတယ်။ ၂၀၁၇ မှာစတင် ဖွဲ့ခဲ့တဲ့ ဒီဖေ့ဘွတ်ဂရုက အဖွဲ့ဝင် ၆ သိန်းတစ်ထောင်ကျော်ရှိပြီး နေ့စဉ် ပို့စ်အသစ်တွေ ရာချီတင်နေတဲ့ Facebook group ဖြစ်ပါတယ်။