မင်းအောင်လှိုင် ရာထူးက နုတ်ထွက်တယ်ဆိုတဲ့ သတင်းအတု
အာဏာသိမ်းစစ်အုပ်စုရဲ့ ခေါင်းဆောင် မင်းအောင်လှိုင်က ရာထူးကနုတ်ထွက်ဖို့ ကြေညာတယ်ဆိုတဲ့ သတင်းအတုတစ်ပုဒ် ထွက်ပေါ်နေပါတယ်။
အဆိုပါ သတင်းအတုကို YouTube ချန်နယ်တစ်ခုက စက်တင်ဘာလ ၁၇ ရက်နေ့မှာ ဖြန့်ထားတာ ဖြစ်ပြီး သတင်းအမှားကို ဖြန့်ဝေရာမှာ ၃ မိနစ်ကျော် ကြာမြင့်တဲ့ Video တစ်ပုဒ်နဲ့ တွဲတင်ထားတာ ဖြစ်ပါတယ်။
အဆိုပါ Video ရဲ့ နောက်ခံမှာ စစ်ကောင်စီခေါင်းဆောင် မင်းအောင်လှိုင် မိန့်ခွန်းပြောနေတဲ့ ဓါတ်ပုံရယ်၊ သူနဲ့ ဒေါ်အောင်ဆန်းစုကြည်တို့ လက်ဆွဲနှုတ်ဆက်နေတဲ့ ဓါတ်ပုံတွေကို အသုံးပြုထားပြီး ဓါတ်ပုံပေါ်မှာ “နိုင်ငံပျက်ကိန်း ဆိုက်လာလို့ ယာယီသမ္မတရာထူးမှ နှုတ်ထွက်ပြီး အာဏာပြန်လွဲတော့မည်ဟု ကြေညာလို့ တကမ္ဘာလုံး အံ့ဩထိတ်လန့် ကုန်ပြီ” (မူရင်း ရေးသားထားသည့်အတိုင်း) လို့ ရေးသားထားပါတယ်။
မူရင်း ရေးသားဖြန့်ဝေမှုကို ဒီနေရာမှာ ကြည့်ပါ။
အဆိုပါ သတင်းအတုကို YouTube ပေါ်မှာ ဝင်ရောက်ကြည့်ရှုထားသူ များစွာရှိနေပါတယ်။
သတင်းဆန်းစစ်ချက်
အာဏာသိမ်းစစ်အုပ်စုရဲ့ ခေါင်းဆောင် မင်းအောင်လှိုင်က ရာထူးကနုတ်ထွက်ဖို့ ကြေညာတယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှုသူများအောင် လုပ်ကြံရေးသားထားတဲ့ သတင်းအတုဖြစ်တာကို တွေ့ရပါတယ်။
စစ်ကောင်စီဟာ နိုင်ငံတော်အာဏာကို သိမ်းယူပြီးနောက် အာဏာတည်မြဲရေးကို ပိုမိုလုပ်ဆောင်လာကာ ပြည်သူအပေါ်ဖိနှိပ်မှုတွေ ပိုမို လုပ်ဆောင်လာနေတာပဲ ဖြစ်ပါတယ်။ ၎င်းအနေနဲ့ ရာထူးက နုတ်ထွက်သွားခြင်း၊ ကြေညာထားခြင်း လုံးဝ မရှိပါဘူး။
ဒါ့အပြင် ဒီအကြောင်းအရာကို မည်သည့်သတင်းဌာန မည်သည့်အဖွဲ့အစည်းမှာမှ ဖော်ပြထားခြင်းမရှိသလို သတင်းအမှားဖြန့်သူတင်ထားတဲ့ Video ထဲမှာလည်း မပါဝင်ပါဘူး။
သတင်းအမှားဖြန့်ထားတဲ့အဖွဲ့ကို ဝင်ရောက်စစ်ဆေးကြည့်တဲ့အခါမှာ ဝင်ရောက်ကြည့်ရှုသူများအောင် လုပ်ကြံရေးသားထားတဲ့သတင်းတွေ ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။