ရုန့်ရင်းဆန်ခတ်ဖြစ်ပွားတဲ့ဗီဒီယို ယနေ့ဖြစ်ပွားခြင်းမဟုတ်

ရဲတပ်ဖွဲ့ဆန္ဒပြသူတွေကြား နဲ့ရုတ်ရုတ်သဲသဲဖြစ်ပွားနေတဲ့ ဗီဒီယိုဖိုင်ဟောင်းတစ်ခုကို လက်ရှိဖြစ်ပွားနေတဲ့ အဖြစ်အပျက်အသွင်နဲ့ Live Video ဖြစ်ပြန်လည်ဖြန့်ဝေလျက်ရှိပါတယ်။

ငါးခူမွေးမြူရေးနည်းစနစ်မျှဝေပေးမည်ဆိုတဲ့ပေ့ချ်မှာ အဆိုပါဗီဒီယိုအဟောင်းကို နားလည်မှုလွဲမှားစေနိုင်တဲ့အရေးအသား ခေါင်းစဉ်မျိုးနဲ့ပြန်လည်ဖြန့်ဝေနေတာဖြစ်ပြီး ဗီဒီယိုခေါင်းစဉ်ကို "ချကုန်ကြပြီ" ဆိုတဲ့ခေါင်းစဉ်နဲ့ရေးသားဖြန့်ဝေခဲ့တာဖြစ်ပါတယ်။အဲ့ဒီအပြင်ဗီဒီယိုကို Live လွှင့်တဲ့အသွင်နဲ့ဖြန့်ဝေထားတာဖြစ်ပါတယ်။ ပြန်လည်ဖြန့်ဝေထားတဲ့ Video ကို ဒီမှာ ကြည့်ပါ။

သတင်းဆန်းစစ်ချက်

အဆိုပါဖြစ်စဉ်ဟာ လတ်တလောဖြစ်ပွားနေတဲ့ရုန့်ရင်းဆန်ခတ်အခြေအနေမဟုတ်ပဲ ဇန်နဝါရီလ ၂၇ ရက်မှာဖြစ်ပွားခဲ့တဲ့ အမျိုးသားရေးမည်ခံဆန္ဒပြသူတွေနဲ့လုံခြုံရေးတာဝန်ယူကြတဲ့ရဲတပ်ဖွဲ့ကြားထိပ်တိုက်တွေ့ဆုံမှုဖြစ်စဉ်မှာရိုက်ကူးထားတဲ့ဗီဒီယိုဖိုင်အဟောင်းသာဖြစ်ပါတယ်။

မူရင်းဗီဒီယိုဖိုင်ဟာ တရားဝင်သတင်းဌာနတစ်ခုဖြစ်တဲ့ Glaxy News - ဂလက်ဆီသတင်းဌာန ဇန်ဝါရီလ ၂၇ ရက်နေ့မှာတင်ဆက်ထားတဲ့ သတင်းပေးပို့ချက် Video ဖြစ်ပြီး အဲ့ဒီ Video ကို ယနေ့ဖြစ်ပွားနေတဲ့အသွင်နဲ့ပြန်လည်ဖြန့်ဝေထားတာဖြစ်ပါတယ်။

တကယ့်ဖြစ်ရပ်ဟာ တပ်မတော်ကိုထောက်ခံတဲ့ အမျိုးသားရေးအမည်ခံ တွေနဲ့ဒဂုံမြို့နယ် ရဲတပ်ဖွဲ့ဝင်တွေကြား ဇန်နဝါရီ ၂၇ရက်နေ့က ဒဂုံမြို့နယ် မြို့မ ကျောင်းလမ်းပေါ်မှာ ရုန့်ရင်းဆန်ခတ်ဖြစ်ပွားခဲ့တဲ့ဖြစ်စဉ်ဖြစ်ပါတယ်။ မူရင်း Video ကို ဒီလင့်မှာကြည့်ပါ။

အဲ့ဒီဖြစ်စဉ်မှာ အမျိုးသားရေးအမည်ခံ သမားတွေဟာ တပ်မတော် ထောက်ခံကြောင်း ၊ ယူအီးစီကို ကန့်ကွက်ကြောင်း ကြွေးကြော်ခဲ့ကြသလို ရဲတပ်ဖွဲ့က ပိတ်ဆို့တားဆီးချိန် မှာ အမျိုးသားရေးအမည်ခံ ဆန္ဒပြသူတွေကပြန်လည်တိုက်ခိုက်ကြတဲ့ Video ဖိုင်ဖြစ်ပါတယ်။

ဖေဖေါ်ဝါရီ ၁ရက်နေ့ တပ်မတော်အာဏာသိမ်းမှုဖြစ်စဉ်အပြီးမှာ လူထုလှုပ်ရှားမှုကိုဦးတည်စေတဲ့ လှုံ့ဆော်မှုတွေရှိနေသလိုလမ်းပေါ်ထွက်ဆန္ဒပြစေဖို့တိုက်တွန်းလှုံ့ဆော်မှုတွေလည်းရှိနေပါတယ်။ ဒီကာလမှာယခုဖြန်ဝေထားတဲ့ဗီဒီယိုဟာ အဖြစ်အပျက်ဟောင်းကဗီဒီယိုကို အသုံးပြုပြီး လူထုထင်ယောင်ထင်မှားဖြစ်စေနိုင်ဖို့လှုံ့ဆော်ဖြန့်ဝေထားတာဖြစ်ပါတယ်။