ဒုံးပျံအပိုင်းအစတွေ ဧရာဝတီတိုင်း ပုသိမ်မြို့ဧရိယာအတွင်း ပြုတ်ကျနိုင်တယ်ဆိုတဲ့ အချက်အလက်အမှား

ဒီသတင်းကို ဇူလိုင် ၂၉ ရက်နေ့မှာ စတင်ဖြန့်ဝေနေတာဖြစ်ပြီး ထပ်ဆင့်ဖြန့်ဝေမှု အများအပြားလည်း ရှိနေပါတယ်။

ဖြန့်ဝေရာမှာ တရုတ်နိုင်ငံက လွှတ်တင်လိုက်တဲ့ဂြိုလ်တုဟာ အာကာသတွင်းပျက်စီးပြီး တနင်္ဂနွေနေ့မှာ မြန်မာနိုင်ငံ ဧရာ၀တီတိုင်းထဲက ပုသိမ်မြို့ဧရိယာအတွင်း ပြုတ်ကျလာနိုင်တယ်လို့ NASA အဖွဲ့က ထုတ်ပြန်ထားကြောင်း၊ ဂြိုလ်တုအစိတ်အပိုင်းများဟာ လွင့်စင်ပြီး လူနေရပ်ကွက်တွေအပြင် ပုသိမ်အနီးတစ်ဝိုက် ၂၆ မိုင်အတွင်း သက်ရောက်နိုင်ကြောင်းနဲ့ တရုတ်ဂြိုလ်တု Long March 5B ပြုတ်ကျတာဟာ ၃ ကြိမ်ရှိခဲ့ပြီး ၂၀၂၀ မေလတုန်းက အာဖရိကနိုင်ငံ အနောက်ဖက်ကမ်းခြေသို့ ပျက်ကျခဲ့စဉ်က လူ ၂၀၀ ကျော် သေကြေခဲ့ရကြောင်းတွေ ရေးသားထားပါတယ်။

ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ကြည့်ရှု့နိုင်ပါတယ်။

သတင်းဆန်းစစ်ချက်

ဒုံးပျံအပိုင်းအစတွေ မည်သည့်နေရာကို ပြုတ်ကျမယ်ဆိုတာနဲ့ ပတ်သတ်ပြီး နေရာအတိအကျ ခန့်မှန်းထားနိုင်ခြင်းမရှိသေးကြောင်းနဲ့ ကမ္ဘာနဲ့ ပိုနီးကပ်လာပြီး ပြုတ်ကျဖို့ နာရီပိုင်းအလိုလောက်မှသာ သိရှိနိုင်မယ်လို့ ကျွမ်းကျင်သူတွေက ပြောကြားထားပါတယ်။

အာကာသအကြောင်း ဖော်ပြနေတဲ့ Aerospace က ခန့်မှန်းထားတဲ့ ဒုံးပျံပျက်ကျနိုင်တဲ့ နေရာကို အောက်ပါပုံမှာ ကြည့်ရှု့နိုင်ပါတယ်။

ပုံမှာ ပြသထားတဲ့ အပြာနဲ့ အဝါရောင် မျဉ်းကြောင်းတွေရဲ့ ဘယ်နေရာမှာမဆို ဒုံးပျံပြန်လည်ကျရောက်လာနိုင်တယ်လို့ ဖော်ပြထားတာဖြစ်ပါတယ်။ဒါဟာ ဧရာ၀တီတိုင်းအတွင်း အတိအကျ ကျရောက်နိုင်တယ်ဆိုတဲ့ အဓိပ္ပါယ်မဟုတ်ပါဘူး

ဒါကြောင့် အခုဖြန့်ဝေနေတဲ့ ဒုံးပျံအပိုင်းအစတွေ ဧရာဝတီတိုင်း၊ ပုသိမ်မြို့အနီးကို ကျရောက်မယ်ဆိုတာတွေဟာ သတင်းအမှားပဲ ဖြစ်ပါတယ်။ ကျွမ်းကျင်သူတွေကိုယ်တိုင် နေရာအတိအကျ ခန့်မှန်းထားနိုင်ခြင်းမရှိသေးကြောင်းနဲ့ နာဆာကလည်း ဒီလိုထုတ်ပြန်ထားတာမျိုး မရှိပါဘူး။

Aerospace မှာ ဖော်ပြပေးနေတဲ့ ဒုံးပျံကျရောက်နိုင်မယ့်နေရာနဲ့ အချိန် ခန့်မှန်းချက်ပြောင်းလဲမှုတွေကို ဒီနေရာ မှာ ဝင်ရောက်ကြည့်ရှု့နိုင်ပါတယ်။