စစ်ကောင်စီလက်အောက်ခံ လေယာဉ်မှူး နှစ်ဦး အလင်းဝင်တယ်ဆိုတဲ့ သတင်းအမှား

ဒီသတင်းကို သတင်းအမှားတွေ ဖြန့်ဝေနေတဲ့ Manually update the address ဆိုတဲ့ ဖေစ့်ဘွတ်ပေချ့်မှာ အောက်တိုဘာလ ၂၇ ရက်နေ့ နေ့လည် ၁၂ နာရီဝန်းကျင်ခန့်မှာ စတင်ဖြန့်ဝေခဲ့တာဖြစ်ပြီး အခြားဖေစ့်ဘွတ်ပေချ့်တွေမှာလည်း ထပ်ဆင့်ဖြန့်ဝေထားပါတယ်။

သတင်းကို NUG သမ္မတအရေးပေါ်ကြေညာ လို့ ရေးသားပြီး ကြာချိန် ၆ မိနစ်ခန့်ရှိတဲ့ ဗွီဒီယိုဖိုင်နဲ့အတူ ဖြန့်ဝေခဲ့တာပါ။ဗွီဒီယိုဖိုင်ကာဗာမှာတော့ 'ဗုံးကြဲတဲ့ လေယာဉ်မှူါ် ၂ ဦး NUG ထံ အလင်းဝင်တယ်လို့ သမ္မတကြေညာ။ မအလခိုင်းတဲ့ သက်သေနဲ့အတူ ICC မှာ သက်သေထွက်ပေးမယ်လို့ပြော' လို့ ရေးသားပြီး ဖြန့်ဝေထားတာပါ။

ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ကြည့်ရှု့နိုင်ပါတယ်။

သတင်းဆန်းစစ်ချက်

အခုဖြန့်ဝေနေတာတွေဟာ လူအများ စိတ်ဝင်စားအောင် ခေါင်းစဉ်ကို လုပ်ကြံဖန်တီးထားတာသာဖြစ်ပြီး လေယာဉ်မှူး ၂ ဦး NUG ထံ အလင်းဝင်တယ်ဆိုတဲ့ သတင်းကို ယုံကြည်စိတ်ချရတဲ့ သတင်းဌာနတွေမှာ ဖော်ပြထားတာမရှိပါဘူး။ ဒီအကြောင်းအရာမျိုးကို NUG ရဲ့ တရားဝင် သတင်းဖြန့်ဝေနေတဲ့ ဖေစ့်ဘွတ်ပေချ့်နဲ့ မီဒီယာတွေမှာလည်း ဖော်ပြထားတာ မရှိပါဘူး။

ဖြန့်ဝေနေတဲ့ ဗွီဒီယိုဖိုင်ထဲမှာလည်း လေယာဉ်မှူး ၂ ဦး အလင်းဝင်တယ်ဆိုတဲ့ အကြောင်းအရာ ပါဝင်ခြင်းမရှိပါဘူး။ ဒီသတင်းမှားတွေဟာ သူတို့ရဲ့ ပေချ့်တွေကို ဝင်ရောက်ကြည့်ရှု့သူများအောင် သတင်းခေါင်းစဉ်တွေမှာ လိမ်ညာရေးသားထားပြီး ကြည့်ရှု့သူအရေအတွက်ကနေ ဝင်ငွေပြန်ရှာနေတဲ့ Click baits လုပ်ခြင်းသာ ဖြစ်ပါတယ်။