အီရန် တရုတ်နဲ့ မြန်မာစစ်ခေါင်ဆောင်ကို လက်စားချေဖို့ ထရမ့် ကတိပြုတယ်ဆိုတဲ့ သတင်းအမှား
အမေရိကန်သမ္မတလောင်း ဒေါ်နယ်ထရမ့်က အီရန် တရုတ်နဲ့ မြန်မာစစ်ခေါင်ဆောင်ကို လက်စားချေဖို့ ကတိပြုတယ်ဆိုပြီး ရေးသားဖြန့်ဝေနေတာတွေဟာ သတင်းအမှားတွေပဲ ဖြစ်ပါတယ်။
ဒီအကြောင်းအရာကို သတင်းအမှားတွေ ဆက်တိုက်ဖြန့်ဝေနေတဲ့ Khit Thit Burma News ဆိုတဲ့ Youtube ချန်နယ်တစ်ခုမှာ နိုဝင်ဘာ ၇ ရက်နေ့မှာ စတင်ဖြန့်ဝေခဲ့တာ ဖြစ်ပြီး သတင်းအမှားဖြန့်ဝေနေတဲ့ ဖေစ့်ဘွတ်ပေချ့်အချို့ကလည်း ပြန်လည်ကူးယူ ဖြန့်ဝေနေတာ ဖြစ်ပါတယ်။
ဖြန့်ဝေရာမှာ ကြာချိန် ၁၀ မိနစ်နီးပါးရှိတဲ့ ဗီဒီယိုဖိုင်တစ်ခုနဲ့အတူ 'ထမင်းဝအောင်စားထားကြ။ Trump လက်စားချေပြီ။ Trump ဒဲ့ကြေညာထားပြီ။ အီရန်၊ တရုတ်နဲ့ စောက်ပု လက်စားချေဖို့ ကတိပြုလိုက်ပြီ။ အားရစရာကြီးဗျို့' လို့ ရေးသား ထားတာပါ။
ဒီအကြောင်းအရာကို ဝင်ရောက်ကြည့်ရှု့သူ အများအပြားလည်း ရှိနေပါတယ်။
ဖြန့်ဝေမှုကို ဒီနေရာ မှာ ဝင်ရောက် ကြည့်ရှု့နိုင်ပါတယ်။
သတင်းဆန်းစစ်ချက်
အီရန်၊ တရုတ်နဲ့ မြန်မာစစ်ခေါင်ဆောင်ကို လက်စားချေဖို့ ထရမ့် ကတိပြုတယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေး ကြည့်တဲ့အခါ လုပ်ကြံဖန်တီးထားတဲ့ သတင်းအတု ဖြစ်တာကို တွေ့ရပါတယ်။
ဖြန့်ဝေထားတဲ့ ဗီဒီယိုဖိုင်ထဲမှာ The Arakan Express News မှာ နိုဝင်ဘာ ၁၀ ရက်နေ့က ဖြန့်ဝေထားတဲ့ 'အီရန်ကို အမြင့်ဆုံးဖိအားပေးဖို့ ထရမ့်အရှိန်မြှင့်စီစဉ်နေ' ဆိုတဲ့ သတင်းကို နောက်ခံစကားပြောနဲ့ ပြန်လည် ပြောဆိုထားတဲ့ ရုပ်သံဖိုင်ပဲ ဖြစ်ပါတယ်။
သတင်းထဲမှာ အမေရိကန်ရွေးကောက်ခံသမ္မတ ဒေါ်နယ်ထရမ့်က အီရန်ရဲ့ အရှေ့အလယ်ပိုင်းသြဇာလွှမ်းမိုးမှုကို ကန့်သတ်ပြီး ရေနံတင်ပို့မှု အပါအဝင် အီရန်အပေါ် အမြင့်ဆုံးဖိအားပေးဖို့ အရှိန်မြှင့် စီစဉ်နေတယ်ဆိုတဲ့ အကြောင်း ရေးသားထားတာပါ။
ဒီသတင်းထဲမှာ အီရန်၊ တရုတ်နဲ့ မြန်မာစစ်ခေါင်ဆောင်ကို လက်စားချေဖို့ ထရမ့် ကတိပြုတယ်ဆိုတဲ့ အကြောင်းအရာ မပါဝင်ပါဘူး။
The Arakan Express News မှာ ဖော်ပြထားတဲ့ သတင်းကို ဒီနေရာ မှာ ဝင်ရောက်ကြည့်ရှု့နိုင်ပါတယ်။
သတင်းအမှားဖြန့်ထားတဲ့ Youtube ချန်နယ်နဲ့ ဖေစ့်ဘွတ်ပေချ့်တွေကို ဝင်ရောက်စစ်ဆေးကြည့်တဲ့အခါမှာ သတင်းတွေကို ဝင်ရောက်ကြည့်ရှုသူ များအောင် လုပ်ကြံရေးသားပြီး ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။