ရဲတပ်ဖွဲ့ဝင် ရာနဲ့ချီပြီး PDFသို့ အလင်းဝင်တယ်ဆိုတဲ့ သတင်းအမှား

ဒီအကြောင်းအရာကို သတင်းအမှားတွေ ဆက်တိုက်ဖြန့်ဝေနေတဲ့ Best Videos ဆိုတဲ့ ဖေစ့်ဘွတ်ပေချ့်မှာ စက်တင်ဘာလ ၂၈ ရက်နေ့ ညနေပိုင်းမှာ စတင်ဖြန့်ဝေခဲ့တာဖြစ်ပြီး ထပ်ဆင့်ဖြန့်ဝေမှု အများအပြားလည်း ရှိနေပါတယ်။ဖြန့်ဝေရာမှာ ကြာချိန် ၉ မိနစ်နီးပါးရှိတဲ့ ဗီဒီယိုဖိုင်တစ်ခုနဲ့အတူ ‘ရာနဲ့ချီတဲ့ရဲတပ်ဖွဲ့တွေ PDF ထံကိုအလင်းဝင်လာကြပြီ။ ဘက်လိုက်တဲ့ ရာထူးတိုးမှုတွေကြောင့် မကျေနပ်တဲ့ရဲတွေ ရာနဲ့ချီ အလင်းဝင်လာကြပြီ’ ဆိုပြီး ရေးသားထားတာပါ။

ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ဝင်ရောက် ကြည့်ရှု့နိုင်ပါတယ်။

သတင်းဆန်စစ်ချက်

ဖြန့်ဝေနေတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက် ကြည့်ရှုသူများအောင် လုပ်ကြံ ရေးသားထားတဲ့ သတင်းအတုဖြစ်တာကို တွေ့ရပါတယ်။

ဖြန့်ဝေထားတဲ့ ဗီဒီယိုထဲမှာ ရဲတပ်ဖွဲ့ဝင် ရာနဲ့ချီပြီး အလင်းဝင်တယ် ဆိုတဲ့ အကြောင်းအရာ မပါဝင်သလို ဘယ်ဒေသကရဲတပ်ဖွဲ့ဝင်တွေ ဘယ် PDF တွေထံမှာ အလင်းဝင်တယ်ဆိုတာမျိုးလည်းမပါဝင်ပါဘူး။

ဗီဒီယိုဖိုင်ထဲမှာတော့ ခေတ်သစ်မီဒီယာမှာ စက်တင်ဘာလ ၂၈ ရက်နေ့က ဖော်ပြထားတဲ့ 'PDF များကို ဖမ်းဆီး သတ်ဖြတ်ခဲ့သူများ၊ တပ်နှင့်ရဲထိပ်ပိုင်းအရာရှိများ၏ သဘောကျ နှစ်ခြိုက်မှု ရရှိသူများ အပါအဝင် ရဲအရာရှိ ၉၂ ဦးကို ရာထူးတိုးပေး' ဆိုတဲ့ သတင်းကို ကူးယူကာ နောက်ခံစကားပြောနဲ့ ပြန်လည်ပြောဆိုထားတဲ့ အကြောင်းအရာသာ ပါဝင်ပါတယ်။

ခေတ်သစ်သတင်းဌာနမှာ ဖော်ပြထားမှုကို ဒီနေရာ မှာ ဝင်ရောက် ကြည့်ရှု့နိုင်ပါတယ်။

သတင်းအမှားဖြန့်ထားတဲ့ အဖွဲ့ကို ဝင်ရောက်စစ်ဆေးကြည့်တဲ့အခါ ဝင်ရောက်ကြည့်ရှု သူများအောင် သတင်းခေါင်းစဉ် ဓါတ်ပုံတွေမှာ လိမ်ညာရေးသားပြီး ကြည့်ရှုများအောင်ပြုလုပ်ထားတဲ့ Click baits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။