ဒေါက်တာဆာဆာက တိုက်လေယာဉ်နဲ့ ဒရုန်းတွေ ပေးတယ်ဆိုတဲ့သတင်းအမှား

ဒီသတင်းကို စက်တင်ဘာလ ၁၉ ရက်နေ့ နေ့လည်ပိုင်းမှာ စတင်ဖြန့်ဝေလာတာ ဖြစ်ပြီး ဒေါက်တာဆာဆာပုံကို အသုံးပြုကာ "NUG အစိုးရအတွက် တိုက်လေယာဉ်အစီး ၉၀ နဲ့ ဒရုန်းအစင်း ၄၀ ပို့ပေးလိုက်တဲ့ ဒေါက်တာဆာဆာ" လို့ ရေးသားဖြန့်ဝေနေတာပါ။ ဖြန့်ဝေရာမှာ အချိန် ၂၂ မိနစ်နီးပါးကြာချိန်ရှိတဲ့ ရုပ်သံဖိုင်တစ်ခုလည်း ပါဝင်ပါတယ်။

ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ကြည့်ရှု့နိုင်ပါတယ်။

သတင်းဆန်းစစ်ချက်

ဖြန့်ဝေမှုမှာ ပါတဲ့ ရုပ်သံဖိုင်ကို ဝင်ရောက်ကြည့်ရှု့စစ်ဆေးကြည့်တာမှာ ပြည်ထောင်စုဝန်ကြီး ဒေါက်တာဆာဆာနဲ့ လန်ဒန်အခြေစိုက် CWS ရုံးနှင့် BHRNရုံးတို့ အတူပြုလုပ်တဲ့ မြန်မာနိုင်ငံရှိ အကျပ်အတည်းများနှင့် စိန်ခေါ်မှုများအကြောင်း အွန်လိုင်းတွေ့ဆုံပွဲမှာ ဒေါက်တာဆာဆာ ပြောထားတဲ့ မိန့်ခွန်းကို ကူးယူဖတ်ပြထားတဲ့ ဖိုင်ပဲဖြစ်ပါတယ်။

ဒီမိန့်ခွန်းထဲမှာ ဒေါက်တာဆာဆာအနေနဲ့ တိုက်လေယာဉ် အစီး ၉၀ နဲ့ ဒရုန်းအစင်း ၄၀ အကြောင်းအရာကို လုံးဝပြောထားတာ မရှိပါဘူး။ ဒီသတင်းကို လူတွေစိတ်ဝင်စားဖို့ အတုပြုလုပ်ပြီးဖြန့်ဝေထားတဲ့ သတင်းအမှားသာ ဖြစ်ပါတယ်။

ဒီမိန့်ခွန်းကို ဒေါက်တာဆာဆာက သူ့ရဲ့တရားဝင်ဖေစ့်ဘွတ်အကောင့်မှာ စက်တင်ဘာလ ၁၈ ရက်နေ့က ဖော်ပြထားပါတယ်။ ဒီနေရာ မှာ ဝင်ရောက်ဖတ်ရှု့နိုင်ပါတယ်။