KNU ထိန်းချုပ်နယ်မြေက မိန်းကလေးတွေကိုယ်ဝန်ဆောင်နေရတယ်ဆိုတဲ့ သတင်းအတု

အဆိုပါ သတင်းအမှားကို Kyaw Htet ဆိုတဲ့ ဖေ့စ်ဘွတ်အကောင့်က ဩဂုတ်လ ၁၁ ရက်နေ့ ၁၀ နာရီ ၄၃ မိနစ်မှာ စတင်ဖြန့်ဝေထားတာ ဖြစ်ပြီး ၎င်းသတင်းအမှားထဲမှာ "knu နယ်‌မြေရောက် GZ အမျိုးသမီး 543 ယောက်ကိုယ် ဝန်ဆောင်ထားကျတယ်။ အများအားဖြင့် အကြိမ်ကြိမ် မုဒိမ်းပြုကျင့်မှ ရတဲ့ကိုယ်ဝန်ကများပြီး..အချို့GZအချင်းချင်း အပြန်အလှန် လိင်ဆက်ဆံရာမှ ကိုယ်ဝန်ရရှိခြင်းလည်း ဖြစ်တယ်။ ကိုယ်ဝန်ပျက်ချသူက 98 ဦးထိရှိပြီး ကိုယ်ဝန်ပျက်ကျလို့ သေဆုံးသူက 45 ဦး အထိရှိနေပြီ မွေးလာမယ့်ကလေးတွေအားလုံး မိဘမဲ့ဂေဟာကို ပို့ဖို့ လတ်မှတ်ထိုး ထားရတယ်။ အားလုံးဘာသာ ပြောင်းပြီးဖြစ်တယ်" (မူရင်းရေးသားထားသည့်အတိုင်း) လို့ ရေးသားထားပါတယ်။

အဆိုပါ သတင်းအမှားကို ကူးယူဖော်ပြသူတွေရှိသလို ထပ်ဆင့်ဖြန့်ဝေထားသူများစွာလည်း ရှိနေပါတယ်။မူရင်းရေးသားဖြန့်ဝေမှုကို ဒီမှာ ကြည့်ပါ။

သတင်းဆန်းစစ်ချက်

KNU ထိန်းချုပ်နယ်မြေရောက် Gen Z အမျိုးသမီးတွေအပေါ် လုပ်ကြံဖြန့်ဝေတဲ့ သတင်းအမှားနဲ့ ပတ်သက်ပြီး Boom Myanmar က အချက်အလက် စစ်ဆေးဖို့ ထိန်းချုပ်နယ်မြေ ရောက်သူရှိတချို့နဲ့အဆက်အသွယ်ရရှိခဲ့ပါတယ်။အဆိုပါအကြောင်းအရာနဲ့ပတ်သက်လို့ သတင်းအမှားဖြန့်ဝေသူတွေရေးသားထားတဲ့ဖြစ်စဉ်မျိုးမရှိကြောင်းနဲ့ အဆိုပါသတင်းဟာ စစ်ကောင်စီကို ဆန့်ကျင်နေတဲ့ ၎င်းတို့လုပ်ငန်းစဉ်တွေကို သွေးခွဲချင်လို့ လုပ်ကြံဖြန့်ဝေထားတဲ့သတင်းအမှားသာဖြစ်ကြောင်း မှတ်ချက်ပြုပါတယ်။

KNU တပ်မဟာ တစ်ခုမှာ ရောက်ရှိနေတဲ့ အမျိုးသမီးတစ်ဦးက "ညီမတို့ ဒီမှာက တိုက်ပွဲဖြစ်တာကလွဲပြီး ကျန်တာဘာမှ မရှိပါဘူး။ တစ်ခါတစ်လေ မိုးအရမ်းသည်းလို့ မှာတဲ့ ပစ္စည်းတွေ ချက်ချင်းမရောက်တာပဲ ရှိတယ်။ ဒီရောက်နေတဲ့ သူအားလုံးကလည်း ရဲဘော်ရဲဘက် စိတ်နဲ့ အရမ်းစည်းလုံးကြတယ်။ အချင်းချင်း မောင်နှမတွေလို စောင့်ရှောက်ကြတယ်။ ညီမတို့ နေရာမှာဆို ဆေးအကူအတွက် Nurse ၃ ယောက် ရှိတယ်။ ရန်ကုန်လောက်တော့ ဆေးတွေ မစုံပေမယ့် အဆင်တော့ ပြေပါတယ်။ ပြီးတော့ အမျိုးသမီး လစဉ်သုံး ပစ္စည်းတွေလည်း ထုတ်ပေးတယ်။ အားလုံးက အဆုံးထိ လျှောက်မယ်ဆိုပြီး ဒီလမ်းကို ရွေးချယ်ခဲ့တဲ့ သူတွေဖြစ်တဲ့အတွက် စည်းစည်းလုံးလုံးရှိကြပါတယ်" လို့ Boom Myanmar ကို ပြောပါတယ်။

ဒီလိုထိန်းချုပ်နယ်မြေက အမျိုးသမီးတွေအပေါ် တိုက်ခဲ့တဲ့ သတင်းအမှားဟာ အစောပိုင်းလတွေကလည်း ထွက်ပေါ်ခဲ့ဖူးပြီး မကြာခဏ ပြန်လည် ဖြန့်ဝေမှုတွေလည်းရှိနေဆဲဖြစ်ပါတယ်။