စစ်ကောင်စီရဲ့ SU-30 ဂျက်တိုက်လေယာဉ် ငါးစီးကိုပစ်ချ တယ်ဆိုတဲ့ သတင်းအမှား
ရှမ်းမြောက်ကို ဗုံးလာကျဲတဲ့ စစ်ကောင်စီရဲ့ SU-30 ဂျက်တိုက်လေယာဉ် ၅ စီး ပစ်ချလိုက်တယ်ဆိုပြီး ဖြန့်ဝေထားတဲ့အကြောင်းအရာတစ်ပုဒ် လူမှုကွန်ရက်ပေါ်မှာဝေမျှနေကြပြီး ဒီအကြောင်းအရာဟာ အမှန်တကယ်ဖြစ်ပွားခဲ့ခြင်းမရှိတဲ့အကြောင်းအရာသာဖြစ်ပါတယ်။
ဒီအကြောင်းအရာကို သတင်းအမှားတွေ ဆက်တိုက်ဖြန့်ဝေနေတဲ့ Yangon Khit Thit ဆိုတဲ့ Youtube ချန်နယ်တစ်ခုမှာ ဩဂုတ်လ၂၁ ရက်နေ့မှာ စတင်ဖြန့်ဝေခဲ့တာ ဖြစ်ပြီး သတင်းအမှားဖြန့်ဝေနေတဲ့ ဖေစ့်ဘွတ်ပေချ့်အချို့ကလည်း ပြန်လည်ကူးယူ ဖြန့်ဝေနေတာ ဖြစ်ပါတယ်။
ဖြန့်ဝေရာမှာ ကြာချိန် ၈ မိနစ်ကျော်သာရှိတဲ့ ဗီဒီယိုဖိုင်တစ်ခုနဲ့အတူ 'SU 30 ၅စီး အနီးကပ်ပစ်ချ။ ရှမ်းမြောက်ကို ဗုံးလာကျဲတဲ့ စကစ လေယာဉ် ပစ်ချခံရပြီး ရုရှားပြန်ဗိုလ်ကြီးသေဆုံး' လို့ ရေးသားထားတာပါ။
ဒီအကြောင်းအရာကို ဝင်ရောက်ကြည့်ရှု့သူ အများအပြားလည်း ရှိနေပါတယ်။
ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ဝင်ရောက် ကြည့်ရှု့နိုင်ပါတယ်။
သတင်းဆန်းစစ်ချက်
SU-30 ဂျက်တိုက်လေယာဉ် ငါးစီးပစ်ချလိုက်တယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေး ကြည့်တဲ့အခါ လုပ်ကြံဖန်တီးထားတဲ့ သတင်းအတု ဖြစ်တာကို တွေ့ရပါတယ်။
ဖြန့်ဝေထားတဲ့ ဗီဒီယိုဖိုင်ဟာ အခြားသတင်းဌာနတွေမှာ ဖော်ပြထားတဲ့ သတင်းတွေကို နောက်ခံစကားပြောနဲ့ ပြန်လည် ပြောဆိုထားတဲ့ ရုပ်သံဖိုင်ပဲ ဖြစ်ပါတယ်။ဒီဗီဒီယိုဖိုင်ထဲမှာ SU-30 ဂျက်တိုက်လေယာဉ် ငါးစီးပစ်ချလိုက်တယ်ဆိုတဲ့ အကြောင်းအရာ မပါဝင်သလို အခြား ယုံကြည်စိတ်ချရတဲ့ သတင်းဌာနတွေနဲ့ သက်ဆိုင်ရာ အဖွဲ့အစည်းတွေကလည်း ထုတ်ဖော်ပြောကြားထားတာ မရှိပါဘူး။
သတင်းအမှားဖြန့်ထားတဲ့ Youtube ချန်နယ်နဲ့ ဖေစ့်ဘွတ်ပေချ့်တွေကို ဝင်ရောက်စစ်ဆေးကြည့်တဲ့အခါမှာ သတင်းတွေကို ဝင်ရောက်ကြည့်ရှုသူ များအောင် လုပ်ကြံရေးသားပြီး ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။