စစ်ကောင်စီ ဒုချုပ်စိုးဝင်း နေအိမ် ဝင်ရောက်စီးနင်းခံရတယ်ဆိုတဲ့ သတင်းအတု
စစ်ကောင်စီ ဒုဗိုလ်ချုပ် စိုးဝင်း နေအိမ် ဝင်ရောက်စီးနင်းခံရပြီး ဇနီးနဲ့ သားတွေ ပစ်သတ်ခံရတယ်ဆိုပြီး ဖြန့်ဝေနေတာတွေဟာ သတင်းအမှားတွေပဲ ဖြစ်ပါတယ်။
![စစ်ကောင်စီ ဒုချုပ်စိုးဝင်း နေအိမ် ဝင်ရောက်စီးနင်းခံရတယ်ဆိုတဲ့ သတင်းအတု စစ်ကောင်စီ ဒုချုပ်စိုးဝင်း နေအိမ် ဝင်ရောက်စီးနင်းခံရတယ်ဆိုတဲ့ သတင်းအတု](https://www.boommyanmar.com/h-upload/2024/06/26/1029019-pdf-attacked.webp)
ဒီအကြောင်းအရာကို သတင်းအမှားတွေ ဆက်တိုက်ဖြန့်ဝေနေတဲ့ Yangon Khit Thit ဆိုတဲ့ Youtube ချန်နယ်တစ်ခုမှာ ဇွန်လ ၂၆ ရက်နေ့မှာ စတင်ဖြန့်ဝေခဲ့တာ ဖြစ်ပြီး သတင်းအမှားဖြန့်ဝေနေတဲ့ ဖေစ့်ဘွတ်ပေချ့်အချို့ကလည်း ပြန်လည်ကူးယူ ဖြန့်ဝေနေတာ ဖြစ်ပါတယ်။
ဖြန့်ဝေရာမှာ ကြာချိန် ၉ မိနစ်နီးပါးရှိတဲ့ ဗီဒီယိုဖိုင်တစ်ခုနဲ့အတူ 'မိသားစုဝင်တွေ မြေအောက်ဝင်ပုန်း။ စိုးဝင်းနေအိမ် PDF များဝင်စီးနင်း။ ဇနီးနဲ့ သားတွေကို နေရာမှာတင် ပွဲချင်းပြီးပစ်ခတ်။ စိုးဝင်းသေနတ်ထိမှန်ပြီး မြေအောက်ထဲဝင်ပုန်း' လို့ ရေးသားထားတာပါ။
ဒီအကြောင်းအရာကို ဝင်ရောက်ကြည့်ရှု့သူ အများအပြားလည်း ရှိနေပါတယ်။
ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ဝင်ရောက် ကြည့်ရှု့နိုင်ပါတယ်။
သတင်းဆန်းစစ်ချက်
စစ်ကောင်စီ ဒုချုပ်စိုးဝင်း နေအိမ် ဝင်ရောက်စီးနင်းခံရတယ်ဆိုပြီး ဖြန့်ဝေနေတဲ့ အကြောင်းအရာကို Boom Myanmar က အချက်အလက် စစ်ဆေး ကြည့်တဲ့အခါ လုပ်ကြံဖန်တီးထားတဲ့ သတင်းအတု ဖြစ်တာကို တွေ့ရပါတယ်။
စစ်ကောင်စီ ဒုဗိုလ်ချုပ် စိုးဝင်းနေအိမ် ဝင်ရောက်စီးနင်းခံရတာ မရှိသလို သူ့ရဲ့ အိမ်သားတွေ အပစ်ခံရတယ်ဆိုတာလည်း မဟုတ်ပါဘူး။
ဒါ့အပြင် ဒီအကြောင်းအရာကို မည်သည့်သတင်းဌာန မည်သည့်အဖွဲ့အစည်းမှာမှ ဖော်ပြထားခြင်းမရှိသလို သတင်းအမှား ဖြန့်သူတင်ထားတဲ့ Video ထဲမှာလည်း မပါဝင်ပါဘူး။
သတင်းအမှားဖြန့်ထားတဲ့ Youtube ချန်နယ်နဲ့ ဖေစ့်ဘွတ်ပေချ့်တွေကို ဝင်ရောက်စစ်ဆေးကြည့်တဲ့အခါမှာ သတင်းတွေကို ဝင်ရောက်ကြည့်ရှုသူ များအောင် လုပ်ကြံရေးသားပြီး ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။