ဒေါ်နယ်ထရမ့်က မုန်တိုင်းကယ်ဆယ်ရေးအတွက် ဒေါ်လာ ၁၃၀၀ လှူဒါန်းခဲ့တယ်ဆိုတဲ့ ဓါတ်ပုံအတု
အမေရိကန် သမ္မတဟောင်း ဒေါ်နယ်ထရမ့်က ဟာရီကိန်း မုန်တိုင်း ကယ်ဆယ်ရေးအတွက် ဒေါ်လာ ၁၃၀၀ လှူဒါန်းခဲ့တယ်ဆိုတဲ့ ဓါတ်ပုံအတုတစ်ပုံ ထွက်ပေါ်နေပါတယ်။
အဆိုပါ ဓါတ်ပုံဟာ ကို လူမှုကွန်ယက် သုံးစွဲသူတွေကြားမှာ ဖြန့်ဝေနေကြတာ ဖြစ်ပြီး အရမ်းချမ်းသာတဲ့ ဘီလီယံနာ တစ်ယောက်က ဒေါ်လာ ၁၃၀၀ ပဲ လှူဒါန်းတယ်ဆိုတဲ့ ခေါင်းစဉ်အမျိုးမျိုးနဲ့ ဖြန့်ဝေနေကြတာ ဖြစ်ပါတယ်။ ဖြန့်ထားတဲ့ ဓါတ်ပုံထဲမှာတော့ Fox News သတင်းဌာန logo နဲ့ ဒေါ်နယ်ထရမ့်က ဟာရီကိန်း မုန်တိုင်း ကယ်ဆယ်ရေးအတွက် ဒေါ်လာ ၁၃၀၀ လှူဒါန်းတယ်ဆိုတဲ့ ချက်လက်မှတ်ကိုင်ထားတဲ့ ထရမ့်ရဲ့ ဓါတ်ပုံကို ဖော်ပြထားပါတယ်။
မူရင်းဖော်ပြမှုကို ဒီနေရာ နဲ့ ဒီနေရာမှာ ကြည့်ပါ။
https://www.threads.net/@joeylanyc/post/DBFGkLUpGcD
https://www.threads.net/@visegradskyjezdec/post/DBHKFyBIZz1
အဆိုပါ ဓါတ်ပုံကို လူမှုကွန်ယက် စာမျက်နှာ အသီးသီးမှာ ဖော်ပြထားကြပါတယ်။
သတင်းဆန်းစစ်ချက်
အမေရိကန် သမ္မတဟောင်း ဒေါ်နယ်ထရမ့်က ဟာရီကိန်း မုန်တိုင်း ကယ်ဆယ်ရေးအတွက် ဒေါ်လာ ၁၃၀၀ လှူဒါန်းခဲ့တယ်ဆိုတဲ့ ဓါတ်ပုံကို Boom Myanmar က အချက်အလက် စစ်ဆေးကြည့်တဲ့အခါ ဓါတ်ပုံအတု ဖြစ်တာကို တွေ့ရပါတယ်။
ဒီဓါတ်ပုံဟာ AI နည်းပညာနဲ့ ဖန်တီးထားတဲ့ ဓါတ်ပုံဖြစ်ပြီး Fox News logo တပ်ကာ ဓါတ်ပုံအစစ်နဲ့တူအောင် ဖန်တီးထားခြင်းသာ ဖြစ်ပါတယ်။ ထရမ့်က ဟာရီကိန်း မုန်တိုင်းဒဏ်ခံခဲ့ရသူတွေအပေါ် ကယ်ဆယ်ရေးအတွက် ဒေါ်လာ ၁၃၀၀ သာ ပေးခဲ့တယ်ဆိုတဲ့ ဖြစ်စဉ်ဟာ မရှိခဲ့သလို အထောက်အထားလည်း မရှိပါဘူး။
အမေရိကန် သတင်းဌာနတစ်ခုဖြစ်တဲ့ USA TODAY ကလည်း ဒီအကြောင်းအရာဟာ သတင်းအတုဖြစ်ကြောင်း AI နဲ့ ဖန်တီးထားတဲ့ ဓါတ်ပုံဖြစ်ကြောင်း အချက်အလက် စစ်ဆေးအတည်ပြုထားပါတယ်။ USA TODAY က ဖော်ပြထားတဲ့ သတင်းကို ဒီနေရာမှာ ကြည့်ပါ။
ဒီသတင်းအမှားဟာ အမေရိကန်မှာ ရွေးကောက်ပွဲ နီးကပ်လာချိန်မှာ ထရမ့်အပေါ် ပုံဖျက်ဖို့ ဖြန့်ထားတဲ့ သတင်းအမှားတစ်ပုဒ်သာ ဖြစ်ပါတယ်။
