ဒုတပ်ချုပ်စိုးဝင်း ယာဉ်တန်း ရန်ကုန်မှာ မိုင်းဆွဲခံရတယ်ဆိုတဲ့ သတင်းအတု
ဒုတပ်ချုပ်စိုးဝင်းရဲ့ ယာဉ်တန်း ရန်ကုန်မှာ မိုင်းဆွဲခံရတယ်ဆိုပြီး ဗီဒီယိုဖိုင်တစ်ုနဲ့အတူ ဖြန့်ဝေထားတဲ့ သတင်းအတုတစ်ပုဒ် ထွက်ပေါ်နေပါတယ်။
အဆိုပါ သတင်းအတုကို YouTube ချန်နယ်တစ်ခုက အောက်တိုဘာလ ၂၀ ရက်နေ့မှာ ဖြန့်ထားတာဖြစ်ပြီး သတင်းအမှားကို ဖြန့်ဝေရာမှာ ၂ မိနစ်ကျော် ကြာမြင့်တဲ့ Video တစ်ပုဒ်နဲ့ တွဲတင်ထားတာ ဖြစ်ပါတယ်။
Video ရဲ့ နောက်ခံမှာ စစ်ကောင်စီဗိုလ်ချုပ်စိုးဝင်းရဲ့ ဓါတ်ပုံရယ်၊ မီးတွေထတောက်နေတဲ့ ဓါတ်ပုံရယ် သတင်းကြေငြာသူတစ်ဦး ပါဝင်တဲ့ ဓါတ်ပုံတွေကို သုံးထားပြီး ဓါတ်ပုံပေါ်မှာ “ရန်ကုန်ရောက်နေတဲ့ ဒုချုပ်စိုးဝင်း စစ်ယာဉ်တန်း ရန်ကုန်ပြည်လမ်းအနီး တည့်တည့်ကြီး မိုင်းဆွဲခံရ။ ပွဲချင်းပြီးသေဆုံး၊ ပြည်သူ ၆ ဦးထိခိုက်” (မူရင်း ဖော်ပြထားသည့်အတိုင်း) လို့ ရေးသားထားပါတယ်။
မူရင်းရေးသားဖြန့်ဝေမှုကို ဒီနေရာမှာ ကြည့်ပါ။ အဆိုပါ Video ကို YouTube ပေါ်မှာ ဝင်ရောက်ကြည့်ရှုသူများစွာ ရှိနေပါတယ်။
သတင်းဆန်းစစ်ချက်
ဒုတပ်ချုပ်စိုးဝင်းရဲ့ ယာဉ်တန်း ရန်ကုန်မှာ မိုင်းဆွဲခံရတယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှုသူများအောင် လုပ်ကြံရေးသားထားတဲ့ သတင်းအတုဖြစ်တာကို တွေ့ရပါတယ်။
စစ်ကောင်စီဒုတပ်ချုပ်စိုးဝင်းယာဉ်တန်းဟာ ရန်ကုန်မှာရော၊ မည်သည့်နေရာမှာမှ မိုင်းဆွဲခံရခြင်း မရှိသေးပါဘူး။ ဒီအကြောင်းအရာဟာ သတင်းအမှားဖြန့်သူတွေက လုပ်ကြံရေးသားထားခြင်းသာ ဖြစ်ပါတယ်။
ဒါ့အပြင် ဒီအကြောင်းအရာကို မည်သည့်သတင်းဌာန မည်သည့်အဖွဲ့အစည်းမှာမှ ဖော်ပြထားခြင်းမရှိသလို သတင်းအမှားဖြန့်သူတင်ထားတဲ့ Video ထဲမှာလည်း မပါဝင်ပါဘူး။ သတင်းအမှားဖြန့်ထားတဲ့အဖွဲ့ကို ဝင်ရောက်စစ်ဆေးကြည့်တဲ့အခါမှာ ဝင်ရောက်ကြည့်ရှုသူများအောင် လုပ်ကြံရေးသားထားတဲ့သတင်းတွေ ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။