လွိုင်ကော်တက္ကသိုလ်က ဝန်ထမ်းတွေကို KNDF က လူသားဒိုင်းအဖြစ် ဖမ်းဆီးထားတယ်ဆိုတဲ့ သတင်းအတု

အဆိုပါ သတင်းအတုကို စစ်ကောင်စီရဲ့ ဝါဒဖြန့်တယ်လီဂရမ်တွေကနေတဆင့် လူမှုကွန်ယက်ပေါ်ကို ဖြန့်ဝေထားတာဖြစ်ပြီး ဖေ့စ်ဘွတ်အကောင့်တွေကတဆင့် လူမှုကွန်ယက်ပေါ် ဖြန့်ဝေထားကြတာ ဖြစ်ပါတယ်။ သတင်းအမှားကို ဖြန့်ဝေရာမှာ လွိုင်ကော်တက္ကသိုလ်က ဆရာ၊ ဆရာမတွေကို ကားတွေပေါ် တင်ဆောင်နေတဲ့ Video ကို အသုံးပြုထားပြီး “လွိင်ကော်တက္ကသိုလ်မှ ဆရာ၊ဆရာမ၊ဝန်ထမ်း ၁၃၄ဦးနှင့်မိသားစုဝင် ၆၄ ဦး ကိုအကြမ်းဖက်KNPPပဒက်များက လူသားဒိုင်းကအဖြစ်ဖမ်းဆီးခေါ်ဆောင်သွားကြောင်းသိရသည်” (အသုံးအနှုန်း မူရင်းဖော်ပြထားသည့်အတိုင်း) လို့ ရေးသားထားပါတယ်။

မူရင်းရေးသားဖြန့်ဝေမှုကို ဒီနေရာ၊ ဒီနေရာ၊ ဒီနေရာ နဲ့ ဒီနေရာမှာ ကြည့်ပါ။

အဆိုပါ သတင်းအတုကို တယ်လီဂရမ်ချန်နယ်တွေအပြင် ဖေ့စ်ဘွတ်အကောင့်တွေနဲ့ပါ ဖြန့်ဝေထားကြပါတယ်။

သတင်းဆန်းစစ်ချက်

လွိုင်ကော်တက္ကသိုလ်က ဆရာ၊ ဆရာနဲ့ ဝန်ထမ်းတွေကို KNDF က လူသားဒိုင်းအဖြစ် ဖမ်းဆီးထားတယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ လုပ်ကြံရေးသားထားတဲ့ သတင်းအတုဖြစ်တာကို တွေ့ရပါတယ်။

ကရင်နီပြည်သူ့ကာကွယ်ရေးတပ်ဖွဲ့တွေဟာ လွိုင်ကော်တက္ကသိုလ်မှာ တပ်စွဲထားတဲ့ စစ်ကောင်စီတပ်တွေနဲ့ တိုက်ပွဲဖြစ်ပွားနေစဉ်ကာလမှာ တက္ကသိုလ်အတွင်းက ပါမောက္ခအပါအဝင် ဆရာ၊ ဆရာမ နဲ့ ဝန်ထမ်းတွေကို ကယ်ထုတ်သွားခဲ့ပါတယ်။ ဒီလို ကယ်ထုတ်သွားတဲ့အပေါ် စစ်ကောင်စီနဲ့ ၎င်းရဲ့ထောက်ခံသူတွေက ဆရာ၊ဆရာမတွေကို လူသားဒိုင်းအဖြစ် ဖမ်းဆီးသွားတာဖြစ်ကြောင်း၊ သတ်ပစ်လိုက်ပြီဖြစ်ကြောင်း အမျိုးစုံဖြန့်ဝေလာကြပါတယ်။

နိုဝင်ဘာလ ၂၀ ရက်နေ့မှာတော့ KNDF က တိုက်ပွဲဖြစ်ပွားရာမှာ ပိတ်မိနေတဲ့ လွိုင်ကော်တက္ကသိုလ်က ဝန်ထမ်းနဲ့ မိသားစုဝင်တွေကို ၎င်းတို့က ဘေးကင်းရာသို့ ကူညီရွေ့ပြောင်းပေးခဲ့ကြောင်း၊ အဆိုပါ ပြောင်းရွေ့ပေးခဲ့ရတဲ့ ဝန်ထမ်းနဲ့ မိသားစုတွေ ဘေးကင်လုံခြုံကြောင်း နာမည်စာရင်းတွေနဲ့ ထုတ်ပြန်လာပါတယ်။

ဒါ့အပြင် ပါမောက္ခအပါအဝင် ဆရာ၊ဆရာမတွေ အားလုံးဘေးကင်းလုံခြုံကြောင်း Video အင်တာဗျုးတစ်ပုဒ်နဲ့ KNDF က ထုတ်ပြန်ထားပါတယ်။

KNDF က ထုတ်ပြန်ထားတဲ့ သတင်းတွေကို ဒီနေရာ နဲ့ ဒီနေရာမှာ ကြည့်ပါ။

သတင်းအမှားဖြန့်ထားတဲ့ ဖေ့စ်ဘွတ်အကောင့်ကို ဝင်ရောက် စစ်ဆေးကြည့်တဲ့အခါမှာ မည်သူမည်ဝါမှန်း ဖော်ပြထားခြင်းမရှိတဲ့ ဖေ့စ်ဘွတ်အကောင့်တု ဖြစ်တာကို တွေ့ရပြီး စစ်ကောင်စီကို ထောက်ခံအားပေးတဲ့ သတင်းတုတွေ သတင်းအမှားတွေ ဆက်တိုက်ဖြန့်နေတဲ့ အကောင့်ဖြစ်တာကို တွေ့ရပါတယ်။