အင်းစိန်ထောင် မီးရှို့ပြီး ထောင်သားတွေ ထွက်ပြေးတယ်ဆိုတဲ့ သတင်းအတု

အဆိုပါ သတင်းအမှားကို Lin Latt ဆိုတဲ့ ဝဘ်ဆိုက်က ဇူလိူင်လ ၂၆ ရက်နေ့မှာ ရေးသားဖြန့်ဝေခဲ့တာဖြစ်ပြီး သတင်းအမှားရဲ့ ခေါင်းစဉ်မှာ "အင်းစိန်ထောင် လောင်ပြီ ထောင်သားတွေ ထွက်ပြေး" ဆိုတဲ့ ခေါင်းစဉ်ကို တပ်ထားပါတယ်။ ၎င်းသတင်းအမှားနဲ့အတူ မီးလောင်နေတဲ့ ဓါတ်ပုံဟောင်း တစ်ပုံရဲ့ အပေါ်မှာ "ည ၇ နာရီ လောင်ပြီဟေ့၊ အင်းစိန်ထောင်မီးရှို့၊ ထောင်သားတွေ ထွက်ပြေး" ဆိုတဲ့ စာသားတွေနဲ့အတူ ရေးသားဖြန့်ဝေထားတာဖြစ်ပါတယ်။ အဲ့ဒီ Website မှာတင်ထားတဲ့ သတင်းအမှားကို ဖေ့ဘွတ်ပေ့ချ်တွေ ၊ လူများတဲ့ ဖေ့စ်ဘွတ် Group တွေကို အကောင့်တုပေါင်းများစွာနဲ့ ကူးယူဖော်ပြလျက်ရှိပါတယ်။

မူရင်းရေးသားဖြန့်ဝေမှုကို ဒီနေရာ ၊ ဒီနေရာ နဲ့ ဒီနေရာမှာ ကြည့်ပါ။

သတင်းဆန်းစစ်ချက်

အင်းစိန်ထောင် မီးလောင်ပြီး ထောင်သားတွေ ထွက်ပြေးတယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးဖို့ အင်းစိန်အကျဉ်းဦးစီးက ဝန်ထမ်းတစ်ယောက်ကို ဆက်သွယ်မေးမြန်းကြည့်တဲ့အခါ အင်းစိန်ထောင်မှာ မီးလောင်ခြင်းလည်း မရှိသလို ထောင်သားတွေ ထွက်ပြေးတဲ့ ဖြစ်စဉ်လည်း မရှိဘူးလို့ ဆိုပါတယ်။

ဇူလိုင်လ ၂၃ ရက်နေ့ မနက်ပိုင်းက အင်းစိန်ထောင်ထဲမှာ စစ်အာဏာရှင်ဆန့်ကျင်ရေးလှုပ်ရှားမှုကြောင့် ဖမ်းဆီးခံထားရသူတွေ တောင်းဆို ဆန္ဒပြမှု ဖြစ်ပွားခဲ့ပြီးနောက် ကောလဟာလများစွာ ထွက်ပေါ်ခဲ့ပါတယ်။ VOA သတင်းတစ်ပုဒ်မှာ ၇ ယောက် ပစ်သတ်ခံရတယ်လို့ ဖော်ပြခဲ့ပြီး DVB သတင်းတစ်ပုဒ်မှာတော့ အယောက် ၂၀ ပစ်သတ်ခံခဲ့ရတယ်လို့ ဖော်ပြခဲ့ပါတယ်။

ဇူလိုင်လ ၂၆ ရက်နေ့ BBC သတင်းတစ်ပုဒ်မှာတော့ အင်းစိန်အကျဉ်းဦးစီးက ပြောခွင့်ရ ဒုညွှန်ကြားရေးမှုးချုပ် ဦးချမ်းအေးကျော်က အင်စိန်ထောင်ထဲမှာ စစ်တပ်က သေနတ်နဲ့ ဝင်ရောက်ပစ်ခတ်ခဲ့ခြင်း မရှိသလို သေဆုံးတဲ့ ဖြစ်စဉ်လည်း မရှိဘူးလို့ ဖြေထားပါတယ်။

BBC က ဖော်ပြခဲ့တဲ့ သတင်းကို ဒီမှာ ဖတ်ပါ။

ဒါ့အပြင် အင်းစိန်အကျဉ်းထောင်ထဲမှာ ရိုက်နှက်ခံရပြီး တိုက်ပိတ်ခံရတယ်ဆိုတဲ့ နာမည်ထွက်နေတဲ့ ရန်ကုန်ပညာရေးတက္ကသိုလ်ကျောင်းသားများသမဂ္ဂ (ဗကသများအဖွဲ့ချုပ်) ဒုဥက္ကဋ္ဌ ကိုဆစ်နိုင် (ခ) ကိုဇော်ထက်နိုင် က ကျန်းမာရေးကောင်းမွန်လျှက်ရှိ ကြောင်း အပြင်မှာထွက်ပေါ်နေတဲ့ အကြောင်းအရာတွေနဲ့ ပတ်သက်ပြီး စိတ်ပူပန်ခြင်း မရှိဖို့ ၊ အကြမ်းဖက် နှိမ်နင်းမှု မရှိခဲ့​ောကာင်း ၂၆ ရက်နေ့ ရက်စွဲနဲ့ အင်းစိန်ထောင်အတွင်းကနေ စာရေးသားထားပါတယ်။