ဒေါ်အောင်ဆန်းစုကြည်ရဲ့ အမှုအားလုံး ရုတ်သိမ်းပြီး ပြန်လွတ်လာပြီဆိုတဲ့ သတင်းအတု

အဆိုပါ သတင်းအတုကို YouTube ချန်နယ်တစ်ခုက ဒီဇင်ဘာလ ၂၃ ရက်နေ့မှာ ဖြန့်ထားတာ ၂ မိနစ် နီးပါးကြာမြင့်တဲ့ Video တစ်ပုဒ်နဲ့ တွဲတင်ထားတာ ဖြစ်ပါတယ်။ ဒီ Video ရဲ့ နောက်ခံမှာ ဒေါ်အောင်ဆန်းစုကြည်ပါဝင်တဲ့ မတူညီတဲ့ ဓါတ်ပုံ ၃ ပုံကို ဖော်ပြထားပြီး ဓါတ်ပုံပေါ်မှာ “ဒေါ်စုအမှုထူးပြီ၊ ဒေါ်စုရဲ့ အမှုအားလုံး ရုတ်သိမ်းပြီး ရာသက်ပန်လွတ်ပြီ။ မင်းအောင်လှိုင်ဆွေးနွေးနေရပြီ” (အသုံးအနှုန်း မူရင်းဖော်ပြထားသည့်အတိုင်း) လို့ ရေးသားထားပါတယ်။

မူရင်းရေးသားဖြန့်ဝေမှုကို ဒီနေရာမှာ ကြည့်ပါ။

အဆိုပါ Video ကို ၃ ရက်အတွင်း ဝင်ရောက်ကြည့်ရှုထားသူ ၉၅၀၀၀ ခန့်ရှိနေပါတယ်။

သတင်းဆန်းစစ်ချက်

‌ဒေါ်အောင်ဆန်းစုကြည်ရဲ့ အမှုအားလုံး ရုတ်သိမ်းပြီး ပြန်လွတ်လာပြီ ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှုသူများအောင် လုပ်ကြံရေးသားထားတဲ့ သတင်းအတုဖြစ်တာကို တွေ့ရပါတယ်။

ဒေါ်အောင်ဆန်းစုကြည်ကို စစ်ကောင်စီက နေပြည်တော်အချုပ်ထောင်မှာ မတရားဖမ်းဆီးချုပ်နှောင်ထားဆဲ ဖြစ်ပြီး အထူးအယူခံလည်း ပယ်ချထားပါတယ်။ လတ်တလော အခြေအနေထိ ဒေါ်အောင်ဆန်းစုကြည်နဲ့ စစ်ကောင်စီ တွေ့ဆုံဆွေးနွေးခြင်း၊ ပြန်လွတ်ပေးခြင်း မရှိသေးပါဘူး။

ဒါ့အပြင် ဒီအကြောင်းအရာကို မည်သည့် သတင်းဌာန မည်သည့်အဖွဲ့အစည်းမှာမှ ဖော်ပြထားခြင်းမရှိသလို သတင်းအမှားဖြန့်သူတွေ တင်ထားတဲ့ Video ထဲမှာလည်း ဒီအကြောင်းအရာမပါဝင်ပါဘူး။

သတင်းအမှားဖြန့်ထားတဲ့ အဖွဲ့ကို ဝင်ရောက် စစ်ဆေးကြည့်တဲ့အခါ ဝင်ရောက်ကြည့်ရှုသူများအောင် သတင်းခေါင်းစဉ်တွေမှာ လိမ်ညာရေးသားထားပြီး ကြည့်ရှုသူအရေအတွက်ကနေ ဝင်ငွေပြန် ရအောင်ပြုလုပ်ထားတဲ့ Click baits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။