ဦးသိန်းစိန် ဦးဆောင်ပြီး ကြားဖြတ်အစိုးရ ဖွဲ့မယ်ဆိုတဲ့ သတင်းအတု
ဦးသိန်းစိန် ဦးဆောင်ပြီး ကြားဖြတ်အစိုးရ ဖွဲ့မယ်ဆိုတဲ့ သတင်းအတု တစ်ပုဒ်ထွက်ပေါ်နေပါတယ်။
အဆိုပါ သတင်းအတုကို YouTube ချန်နယ်တစ်ခုက မတ်လ ၂၅ ရက်နေ့မှာ ဖြန့်ထားတာ ဖြစ်ပြီး သတင်းအမှားကို ဖြန့်ဝေရာမှာ ၈ မိနစ်ကျော် ကြာမြင့်တဲ့ Video တစ်ပုဒ်နဲ့ တွဲတင်ထားတာ ဖြစ်ပါတယ်။ ဒီ Video ရဲ့ နောက်ခံမှာ ဦးသန်းရွှေရဲ့ ဓါတ်ပုံရယ်၊ ဦးသိန်းစိန်ရဲ့ ဓါတ်ပုံရယ်၊ သတင်းကြေညာသူတွေ ပါဝင်တဲ့ ဓါတ်ပုံတွေကို သုံးပြုထားပြီး ဓါတ်ပုံပေါ်မှာ “နစက ဖျက်သိမ်းရန် သဘောတူပြီ။ ဦးသိန်းစိန်ဦးဆောင်ပြီး အစိုးရဖွဲ့မည်။ ကြားဖြတ်သတင်းကြီးနေပြည်တော်မှာ ပျံ့နှံ့နေ” (မူရင်း ရေးသားထားသည့်အတိုင်း) လို့ ရေးသားထားပါတယ်။
မူရင်း ရေးသားဖြန့်ဝေမှုကို ဒီနေရာမှာ ကြည့်ပါ။
အဆိုပါ သတင်းအတုကို YouTube ပေါ်မှာ ဝင်ရောက်ကြည့်ရှုထားသူ များစွာ ရှိနေပါတယ်။
သတင်းဆန်းစစ်ချက်
ဦးသိန်းစိန် ဦးဆောင်ပြီး ကြားဖြတ်အစိုးရ ဖွဲ့မယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှုသူများအောင် လုပ်ကြံရေးသားထားတဲ့ သတင်းအတုဖြစ်တာကို တွေ့ရပါတယ်။
စစ်ကောင်စီခေါင်းဆောင် အဖြစ် မင်းအောင်လှိုင်ဟာ အာဏာယူထားဆဲဖြစ်ပြီး ဖျက်သိမ်းခြင်း မရှိသလို ဦးသိန်းစိန်က ကြားဖြတ်အစိုးရ ဖွဲ့ခြင်းလည်း မရှိပါဘူး။ ဒီအကြောင်းအရာဟာ သတင်းအမှားဖြန့်သူတွေက လုပ်ကြံရေးသားထားခြင်းသာ ဖြစ်ပါတယ်။
ဒါ့အပြင် ဒီအကြောင်းအရာကို မည်သည့်သတင်းဌာန မည်သည့်အဖွဲ့အစည်းမှာမှ ဖော်ပြထားခြင်းမရှိသလို သတင်းအမှားဖြန့်သူတင်ထားတဲ့ Video ထဲမှာလည်း မပါဝင်ပါဘူး။
သတင်းအမှားဖြန့်ထားတဲ့အဖွဲ့ကို ဝင်ရောက်စစ်ဆေးကြည့်တဲ့အခါမှာ ဝင်ရောက်ကြည့်ရှုသူများအောင် လုပ်ကြံရေးသားထားတဲ့သတင်းတွေ ကြည့်ရှုသူအရေအတွက်ကနေ ဝင်ငွေပြန်ရနိုင်တဲ့ Clickbaits သတင်းတွေ ဖြန့်နေတဲ့အဖွဲ့ဖြစ်တာကို တွေ့ရပါတယ်။