သရုပ်ဆောင် ဦးကျော်သူ ကွယ်လွန်သွားပြီဆိုတဲ့ သတင်းအတု

အဆိုပါ သတင်းအတုကို Newsradi ဆိုတဲ့ Website တစ်ခုက ဖြန့်ဝေထားတာဖြစ်ပြီး ဦးကျော်သူရဲ့ ဓါတ်ပုံတွေကို အသုံးပြုထားကာ ဓါတ်ပုံအပေါ်မှာ “ရုပ်ရှင်မင်းသားကြီး ဦးကျော်သူ ရုတ်တရက် ထင်မထားပဲ ကွယ်လွန်ဆုံးပါးသွားရှာပြီ။ ဘာတွေနောက်ဆုံး မှာသွားခဲ့သလဲ” လို့ ရေးသားထားပါတယ်။ ဒီ Website ရဲ့ အတွင်းမှာတော့ ဦးကျော်သူ ဆုံးပါးသွားတဲ့ သတင်းကိုဝင်ရောက် ကြည့်ရှုဖို့ဆိုပြီး YouTube Video တစ်ပုဒ်ထပ်တင်ထားပါတယ်။

မူရင်းရေးသားဖြန့်ဝေမှုကို ဒီနေရာ နဲ့ ဒီနေရာမှာ ကြည့်ပါ။

အဆိုပါ သတင်းအတုကို ဖေ့စ်ဘွတ်ပေ့ချ်တွေနဲ့ လူများတဲ့ Group တွေထဲကို ဖြန့်ဝေထားကြပြီး YouTube ပေါ်မှာလည်း ဖြန့်ဝေထားကြပါတယ်။

သတင်းဆန်းစစ်ချက်

ရုပ်ရှင်သရုပ်ဆောင် ဦးကျော်သူ ကွယ်လွန်သွားတယ်ဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှု့သူများအောင် လိမ်ညာရေးသားထားတဲ့ သတင်းအတုဖြစ်တာကို တွေ့ရပါတယ်။

ဦးကျော်သူရဲ့ ဖခင်ဖြစ်သူ ဦးစိန်တင် ဟာ မတ်လ ၃ ရက်နေ့မှာ ကွယ်လွန်သွားခဲ့ပြီး မတ်လ ၅ ရက်နေ့ မနက်ပိုင်းက ရေးဝေးသုသာန်မှာ ဂူသွင်း သဂြိုလ်ခဲ့ပါတယ်။ ဦးကျော်သူကတော့ စစ်ကောင်စီတပ်တွေရဲ့ ပုဒ်မ ၅၀၅ နဲ့ ဖမ်းဝရမ်းကြောင့် တိမ်းရှောင်နေရတဲ့အတွက် ဖခင်ဖြစ်သူရဲ့ နာရေးကို လိုက်ပါပို့ဆောင်နိုင်ခြင်း မရှိခဲ့ပါဘူး။ ဦးကျော်သူကတော့ စစ်ကောင်စီတပ်တွေရဲ့ လွတ်မြောက်ရာဒေသတစ်ခုမှာ ဘေးကင်းစွာ ရှိနေဆဲ ဖြစ်ပါတယ်။

ဒါ့အပြင် သတင်းအမှားတင်ထားတဲ့ Website အတွင်းမှာရော ထပ်မံဝင်ရောက်ကြည့်ရှု့ဖို့ ဖြန့်ထားတဲ့ YouTube Video အတွင်းမှာရော ဒီအကြောင်းအရာ မပါဝင်ပါဘူး။

သတင်းအမှားဖြန့်ထားတဲ့အဖွဲ့ကို ဝင်ရောက်စစ်ဆေးကြည့်တဲ့အခါ သတင်းခေါင်းစဉ်တွေမှာ လိမ်ညာရေးသားပြီး ကြည့်ရှု့သူအရေအတွက်ကနေ ဝင်ငွေပြန်ရအောင် ပြုလုပ်ထားတဲ့ Clickbaits သတင်းတွေ တင်နေတဲ့အဖွဲ့ဖြစ်တာကို တွေ့ရပါတယ်။