အရေပြားရောဂါပျောက်ဆေး လိမ်ရောင်းနေတဲ့ ဖေစ့်ဘွတ်ပေချ့်အတု

ဒီဆေးတွေကို Ei Ei Naing ဆိုတဲ့ ဖေစ့်ဘွတ်ပေချ့်မှာ မေလ ၃၁ ရက်နေ့နဲ့ ဇွန်လ ၂၃ ရက်နေ့တွေမှာ ဖြန့်ဝေထားတာဖြစ်ပြီး ထပ်ဆင့်ဖြန့်ဝေမှုတွေလည်း ရှိနေပါတယ်။

ဖြန့်ဝေရာမှာ ဆေးဗူးပုံနဲ့ အရေပြားရောဂါခံစားနေရတဲ့ ကိုယ်အင်္ဂါအစိတ်အပိုင်း ဓာတ်ပုံအချို့နဲ့အတူ အောက်ပါစာသားတွေကိုရေးသားဖြန့်ဝေထားတာဖြစ်ပါတယ်။

'သူဟာ အရေပြားယားယံခြင်းနဲ့ အကြေးခွံမှိုရောဂါကို ခံစားနေရသည်မှာ 3 နှစ်ကျော်ရှိပြီဖြစ်ကြောင်း၊ 3 နှစ်ကြာပြီး နောက်မှာတော့ ယားယံမှုက ကျွန်တော့်ခန္ဓာကိုယ် ရဲ့ နေရာတော်တော်များများကို ပျံ့နှံ့သွားပြီး ဆိုးရွားစွာ မသက်မသာ ဖြစ်စေခဲ့ ကြောင်း၊ အရေပြားအထူးကုဆရာဝန်က မှိုပိုးကူးစက် ခံထားရကြောင်း စစ်ဆေးတွေ့ရှိခဲ့ပြီး Antibacterial Cream ကို အကြံပြု ထားကြောင်း၊ ဆရာဝန် ပေးတဲ့ ဝက်ဆိုက်လိပ်စာကသာ ဆေးကိုဝယ်ယူရမှာဖြစ်ကြောင်း၊ တခြား စျေးသက်သာတဲ့ ဝက်ဆိုက်က ဆေးမှာယူသုံးမိတဲ့အတွက် ရောဂါပိုဆိုးသွားခဲ့ကြောင်း' တွေ ရေးသားထားကာ ဆေးမှာယူရမယ့် link တစ်ခုပေးထားပါတယ်။

ဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ဝင်ရောက်ကြည့်ရှု့နိုင်ပါတယ်။

သတင်းဆန်းစစ်ချက်

ဖြန့်ဝေနေတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက် ကြည့်ရှုသူတွေကို လိမ်ညာပြီး ငွေကြေးလိမ်လည်နေတဲ့ ဖေစ့်ဘွတ်ပေချ့်အတု ဖြစ်နေပါတယ်။

Ei Ei Naing ဆိုတဲ့ ဖေစ့်ဘွတ်ပေချ့်ဟာ မေလ ၃၁ ရက်နေ့မှ စတင်ထောင်ထားတဲ့ ပေချ့်ဖြစ်ပြီး ပိုစ့် ၂ ခုသာ ဖြန့်ဝေထားတာ တွေ့ရပါတယ်။မေလ ၃၁ ရက်နေ့က ဖြန့်ဝေထားတဲ့ ပထမဆုံး ပိုစ့်မှာ သူမရဲ့ ခင်ပွန်းဟာ အရေပြားရောဂါ ခံစားနေရတယ်လို့ ဖြန့်ဝေထားပေမယ့် ဇွန်လ ၂၃ ရက်နေ့မှာ ထပ်မံဖြန့်ဝေတဲ့ ပိုစ့်မှာတော့ သူကိုယ်တိုင်ခံစားနေရပုံ ရေးသားထားပါတယ်။

ဖြန့်ဝေမှုမှာ ပါဝင်တဲ့ ဓာတ်ပုံတွေကို Boom က ရှာဖွေ စစ်ဆေးကြည့်ရာမှာ တခြားနိုင်ငံက ဓာတ်ပုံတွေကို ကူးယူပြီး ပြန်လည်ဖြန့်ဝေ ထားတဲ့ပုံတွေသာ ဖြစ်ပါတယ်။

အထက်ပါ ပုံတွေထဲက ဘယ်ဘက်က ပုံဟာ အွန်လိုင်းစျေးရောင်း ဝက်ဆိုက်တစ်ခုဖြစ်တဲ့ ဗီယက်နမ်နိုင်ငံရဲ့ Lazada ဆိုက်မှာ တင်ထားတဲ့ ပုံဖြစ်ပြီး ညာဘက်က ပုံကတော့ ထိုင်းနိုင်ငံက skin care ကြော်ငြာတဲ့ ဖေစ့်ဘွတ်ပေချ့်နဲ့ ဝက်ဆိုက်တွေမှာ ဖော်ပြနေတဲ့ ပုံတွေ ဖြစ်ပါတယ်။

ပုံတွေကို ဒီနေရာ နဲ့ ဒီနေရာ တွေမှာ ဝင်ရောက်ကြည့်ရှု့နိုင်ပါတယ်။

နောက်တစ်ချက်အနေနဲ့ ဒီပေချ့်က ဖြန့်ဝေထားတဲ့ ဆေးဝယ်ယူရမယ့် လင့်ထဲမှာ ဒီဆေးရောင်းသူ (သို့) လုပ်ငန်းလိပ်စာ၊ ကုန်ပစ္စည်း အကြောင်းအရာတွေ ရေးသားမထားတဲ့အပြင် ဒီဆေးအကြောင်း မှတ်ချက်ရေးသူတွေကို ဖော်ပြထားတာမှာလည်း မပြေပြစ်တဲ့ မြန်မာစာ အရေးအသားတွေ တွေ့ရှိရပါတယ်။

အပေါ်မှာ ပြထားတဲ့ ပုံထဲက အရေးအသားတွေဟာ တခြားဘာသာစကား တစ်ခုခုကနေ Google translate အသုံးပြုပြီး မြန်မာဘာသာကို တိုက်ရိုက်ပြောင်းလဲ ထားတဲ့ ပုံစံတွေ ဖြစ်နေပါတယ်။

ဒါကြောင့် အွန်လိုင်းပေါ်က ပစ္စည်းတွေ မှာယူသုံးစွဲရာမှာ သတိထားဘို့ လိုအပ်ပြီး အကောင့်အတု ပေချ့်အတုတွေ အသုံးပြုပြီး လိမ်ညာမှုတွေ အများအပြား ရှိနေပါတယ်။