အဆိုပါ သတင်းအတုကို Get the light ဆိုတဲ့ ဖေ့စ်ဘွတ်ပေ့ချ်က ဖေဖော်ဝါရီလ ၂၆ ရက်နေ့မှာ ရေးတင်ထားတာဖြစ်ပြီး သတင်းအမှားကို ဖြန့်ဝေရာမှာ ၁၁ မိနစ်ကျော် ကြာမြင့်တဲ့ Video တစ်ပုဒ်နဲ့ တွဲတင်ထားတာဖြစ်တယ်။ Video ရဲ့ နောက်ခံဓါတ်ပုံပေါ်မှာ သတင်းကြေညာနေသူတစ်ဦးရယ် ဗိုလ်ချုပ်ဂွမ်မော်၊ AA စစ်ဦးစီးချုပ်အပါအဝင် တော်လှန်ရေးလက်နက်ကိုင် အဖွဲ့ခေါင်းဆောင် ၄ ဦးရဲ့ ဓါတ်ပုံကို ဖော်ပြထားပါတယ်။ ဓါတ်ပုံပေါ်မှာ “NUG က စစ်ဦးစီးချုပ် ၄ ဦးခန့်အပ်ပြီး အင်အား ၆ သိန်းနဲ့ မြို့သိမ်းတိုက်ပွဲ စပြီ” လို့ ဖော်ပြထားကာ ဒီ Video ကို လူမှုကွန်ယက်ပေါ်ဖြန့်ဝေရာမှာတော့ အင်အား ၆ သိန်းနဲ့ မြို့သိမ်းတိုက်ပွဲ စဖြစ်ပြီတယ်လို့ ဖော်ပြထားပါတယ်။
မူရင်းရေးသားဖြန့်ဝေမှုကို ဒီနေရာ နဲ့ ဒီနေရာမှာ ကြည့်ပါ။
အဆိုပါ Video ကို Like လုပ်ထားသူ ၅ ထောင်ကျော်နဲ့ ဝင်ရောက်ကြည့်ရှုထားသူ ၁ သိန်း ၈ သောင်းကျော်ရှိကာ YouTube ပေါ်မှာ ဝင်ရောက်ကြည့်ရှုထားသူ ၇၀၀၀ ကျော်ရှိနေပါတယ်။
သတင်းဆန်းစစ်ချက်
NUG က စစ်ဦးစီးချုပ် ၄ ဦးခန့်အပ်ပြီး အင်အား ၆ သိန်းနဲ့ မြို့သိမ်းတိုက်ပွဲစပြီဆိုတဲ့ အကြောင်းအရာကို Boom Myanmar က အချက်အလက် စစ်ဆေးကြည့်တဲ့အခါ ဝင်ရောက်ကြည့်ရှုသူများအောင် လုပ်ကြံရေးသားထားတဲ့ သတင်းအတုဖြစ်တာကို တွေ့ရပါတယ်။
ဖေဖော်ဝါရီလ ၁၀ ရက်နေ့မှာ NUG သမ္မတရုံးက ပြောရေးဆိုခွင့်ရှိသူ ဦးကျော်ဇောက အမျိုးသားညီညွတ်ရေးအစိုးရအဖွဲ့အတွက် စစ်ဦးစီးချုပ်တစ်ဦး ခန့်အပ်မယ်လို့ ပြောကြားခဲ့ပါတယ်။ အခုချိန်ထိတော့ စစ်ဦးစီးချုပ် ခန့်အပ်မယ့် သတင်းက ထပ်မံထွက်ပေါ်လာခြင်း မရှိသေးသလို NUG က စစ်ဦးစီးချုပ် ၄ ဦးခန့်အပ်လိုက်တယ်ဆိုတာလည်း သတင်းအမှားသာဖြစ်ပြီး အင်အား ၆ သိန်းနဲ့ မြို့သိမ်းတိုက်ပွဲ စခြင်းလည်း မရှိပါဘူး။
ဒါ့အပြင် ၎င်းတို့ ဖြန့်ထားတဲ့ Video အထဲမှာလည်း ဒီအကြောင်းအရာ မပါဝင်ပါဘူး။ ဒီ Video အတွင်းမှာ NUG က ခန့်အပ်မယ့် စစ်ဦးစီးချုပ် ဘယ်သူဖြစ်နိုင်မလဲဆိုတဲ့ သုံးသပ်ချက်သာ ပါဝင်ပါတယ်။
သတင်းအမှားဖြန့်ထားတဲ့အဖွဲ့ကို ဝင်ရောက်စစ်ဆေးကြည့်တဲ့အခါ ဝင်ရောက်ကြည့်ရှုသူများအောင် သတင်းခေါင်းစဉ်တွေမှာ လိမ်ညာရေးသားပြီး ကြည့်ရှုသူအရေအတွက်ကနေ ဝင်ငွေပြန်ရအောင် ပြုလုပ်ထားတဲ့ Clickbaits သတင်းတွေ ဖြန့်နေတဲ့ အဖွဲ့ဖြစ်တာကို တွေ့ရပါတယ်။