ငွေစက္ကူကြောင့်ရောဂါကူးစက်နိုင်ခြေများတယ်ဆိုတဲ့ သတင်းအမှား

ဒီရက်ထဲမှာပဲ Hand Spray ရောင်းတဲ့လုပ်ငန်းတစ်ခုက COVID – 19 ဟာငွေစက္ကူတွေဆီကတဆင့် ကူးစက်နိုင်ချေများတယ်လို့ ကျန်းမာရေးဝန်ကြီးဌာနက သတိပေးတယ်ဆိုပြီးကြော်ငြာနေတာ တွေ့ရပါတယ်။

ဒီလိုငွေစက္ကူတွေမှာ ဒီလို ရောဂါပိုးကူးစက်ပျံ့နှံ့နိုင်တယ်ဆိုတဲ့အကြောင်းရာတွေနဲ့ ပတ်သက်ပြီး BOOM က မကြာခဏ သတင်းဆန်းစစ်ချက်ပြုလုပ်ထားပြီးဖြစ်ပါတယ်။ ဒီနေရာ မှာ ကြည့်ရှု့နိုင်ပါတယ်။

ယခင်ကလည်းဒီလိုအကြောင်းအရာတွေကို မကြာခဏဖြန့်ဝေနေကြတာရှိသလို ၊ အခုတခါမှာလည်း Galaxy Clean ဆိုတဲ့ ဖေစ့်ဘွတ်စာမျက်နှာက လက်ဆေးရည် (Hand Sanitizer Gel) ရောင်းချတဲ့ ပိုစ့်တစ်ခုမှာ ဒီမှားယွင်းတဲ့ သတင်းအချက်အလက်ကို အသုံးပြုပြီး ထုတ်ကုန်ကြော်ငြာအဖြစ် ရေးသားဖြန့်ဝေထားတာဖြစ်ပါတယ်။

ငွေစက္ကူကိုင်တွယ်သုံးစွဲမှုနဲ့ပတ်သက်လို့ တချို့ဖြန့်ဝေမှုတွေမှာလည်း အရက်ပြန်စွတ်ပြီး ပုဝါတစ်ထည်နဲ့ ထုပ်သိမ်းပါဖို့နဲ့ မိနစ် ၃၀ လောက်ကြာမှ ကိုင်တွယ်ပါ ဆိုပြီး ရေးသားထားပါသေးတယ်။COVID – 19 ဟာငွေစက္ကူတွေဆီကတဆင့်ကူးစက်နိုင်ချေများကြောင်း ကျန်းမာရေးဝန်ကြီးဌာနက သတိပေးတယ်ဆိုတဲ့ ရေးသားဖြန့်ဝေမှုတွေက ဆက်လက်ရှိနေဆဲဖြစ်ပြီး ဒီလိုဖြန့်ဝေမှုတွေကို ဒီနေရာ နဲ့ ဒီနေရာ တွေမှာ ကြည့်ရှု့နိုင်ပါတယ်။

သတင်းဆန်းစစ်ချက်

ကျန်းမာရေးဝန်ကြီးဌာနအနေနဲ့ ဒီသတင်းကိုရေးသားနေချိန် စက်တင်ဘာလ ၂၂ ရက်နေ့အထိ COVID – 19 ဟာ ငွေစက္ကူတွေဆီကတဆင့် ကူးစက်နိုင်ချေများလို့ ကြေငြာထားခြင်း မရှိသေးပါဘူး။ ကျန်းမာရေးနှင့်အားကစားဝန်ကြီးဌာနက ထုတ်ပြန်ထားတဲ့ အသေးစိတ်ေကြေငြာချက်တွေကို ဒီနေရာ မှာ သွားရောက်လေ့လာ နိုင်ပါတယ်။

အထက်မှာ ဖော်ပြခဲ့သလို ဒီအကြောင်းအရာနဲ့ ပါတ်သတ်ပြီး BOOM က သတင်းဆန်းစစ်ချက်ပြုလုပ်ထားပြီးဖြစ်ပြီး သတင်းပါအချက်တွေထဲမှာ လေ့လာမှုတွေအရ ဒီနေ့အထိ COVID – 19 ဟာ ငွေစက္ကူတွေဆီမှာ ကြီးထွားအသက်ရှင်နိုင်ခြင်းနဲ့ ပျံ့နှံ့ကူးစက်နိုင်ခြင်း ရှိ၊

မရှိ ဆိုတာကို သက်သေပြနိုင်တဲ့အချက် မရှိသေးကြောင်း၊ WHO အနေနဲ့လည်း ငွေစက္ကူတွေကိုင်တွယ်မယ်ဆိုရင် သန့်ရှင်းမှုရှိဖို့သာ အကြံပြုထားကြောင်း၊ လက်များကို မကြာခဏေ ဆးကြောဖို့နဲ့ အခြေခံသန့်ရှင်းရေးပြုလုပ်ခြင်းကို လိုက်နာဖို့လိုကြောင်း ရေးသားဖော်ပြထားပါတယ်။

အသေးစိတ်အချက်အလက်တွေကို BOOM က ရေးသားထားခဲ့တဲ့ သတင်းမှာ သွားရောက်ဖတ်ရှု့နိုင်ပါတယ်။

အဲ့ဒီအပြင် စက်တင်ဘာလ ၂၂ ရက်မှာပဲဒီအကြောင်းအရာနဲ့ပတ်သက်လို့ MRTV ဖေ့စ်ဘွတ် Page မှာ သတင်းအမှန်ကိုဝေမျှထားပါသေးတယ်။အဆိုပါသတင်းမှာတော့ ဆေးတက္ကသိုလ် (၁)ရန်ကုန် ၊ ဆေးပညာဌာနမှ ဂုဏ်ထူးဆောင်ပါမောက္ခ ဒေါက်တာညွန့်သိန်းက အခုလိုပြောကြားထားတာကို အခုလိုဝေမျှထားတာဖြစ်ပါတယ်။

"လက်ရှိတွင် ငွေစက္ကူမှတစ်ဆင့် ရောဂါပိုးကူးစက်သည်ဟူသော အကြောင်းအရာ မရှိသော်လည်း ကိုင်တွယ်ပြီးသောအခါတိုင်း မျက်စိ၊နား၊ နှာခေါင်းစသော မျက်နှာ၏ T Zone နေရာများကို မထိတွေ့မိစေရန်နှင့် လက်ကို စင်ကြယ်စွာ ဆေးကြောခြင်းဖြင့် ကူးစက်မှုကို ကာကွယ်နိုင်ကြောင်း ဆေးတက္ကသိုလ် (၁)ရန်ကုန် ၊ ဆေးပညာဌာနမှ ဂုဏ်ထူးဆောင်ပါမောက္ခ ဒေါက်တာညွန့်သိန်း မှ သတိပေးပြောကြားထားကြောင်း သိရပါသည်" လို့ဖေါ်ပြထားတာဖြစ်ပါတယ်။ မူရင်းသတင်းကို ဒီလင့်မှာ ဝင်ရောက်ကြည့်ရှုနိုင်ပါတယ်။

ဒါကြောင့် လက်ရှိဖြန့်ဝေမှုမှာပါဝင်တဲ့ COVID – 19 ဟာငွေစက္ကူတွေဆီကတဆင့် ကူးစက်နိုင်ချေများတယ်လို့ ကျန်းမာရေးဝန်ကြီးဌာနက သတိပေးတယ်ဆိုတဲ့ အချက်ဟာ ကျန်းမာရေးဝန်ကြီးဌာနက ကြေငြာထားခြင်းမရှိသလို သတင်းအမှန်လည်းမဟုတ်ကြောင်း စိစစ်ဖေါ်ပြလိုက်ပါတယ်။